ДХХ ходимлари томонидан Тошкент вилояти божхона бошқармаси ҳамда Сирдарё вилояти ИИБ билан ҳамкорликда ўтказилган тезкор тадбирлар давомида гиёҳванд моддалар савдосига чек қўйилди.
Маълум қилинишича, ДХХ ходимлари томонидан Тошкент вилояти божхона бошқармаси ҳамда Сирдарё вилояти ИИБ билан ҳамкорликда «Сирдарё» ЙПХ масканида тезкор тадбир ўтказилган. Унда Қашқадарёдан Тошкент вилояти томон келаётган Қарши шаҳрида яшовчи 36 ёшли шахс бошқарувидаги Nexia русумли автомашина тўхтатилиб, кўздан кечирилган.
Натижада, автомашинанинг юкхонасига яшириб қўйилган 4 килограмм 534 грамм гашиш гиёҳвандлик воситаси аниқланиб, процессуал тартибда расмийлаштириб олинган. Маълум бўлишича, ушбу фуқаро тожикистонлик наркосавдогар томонидан контрабанда йўли билан юборилган наркотик моддаларни хуфия жойларга яшириб, мижозларга сотиш билан шуғулланиб келган.
Дастлабки суриштирув ҳаракатлари давомида уни Тошкент шаҳрида яшовчи, муқаддам судланган шериги (1977 йилда туғилган) Зангиота туманида кутиб тургани маълум бўлиб, у ҳам қўлга олинган.
Шунингдек, тезкор-қидирув тадбирлари доирасида уларнинг яна бир шериги, Қарши шаҳрида яшовчи 42 ёшли шахснинг яшаш хонадонидан 11 килограмм 168 гашиш гиёҳвандлик воситаси ўрнатилган тартибда расмийлаштириб олинган. Ўтказилган тезкор тадбирлар натижасида жами 15 килограмм 702 грамм гашиш моддаси мусодара қилинган.
Ҳозирда мазкур шахсларга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Аввалроқ Фарғонада томорқасида 100 туп кўкнори етиштираётган шахс аниқлангани, Тошкент шаҳри ва вилоятида кучли таъсир қилувчи дорилар савдоси билан шуғулланган 9 киши ушлангани тўғрисида хабар берилганди.
Изоҳ (0)