DXX xodimlari tomonidan Toshkent viloyati bojxona boshqarmasi hamda Sirdaryo viloyati IIB bilan hamkorlikda o‘tkazilgan tezkor tadbirlar davomida giyohvand moddalar savdosiga chek qo‘yildi.
Ma’lum qilinishicha, DXX xodimlari tomonidan Toshkent viloyati bojxona boshqarmasi hamda Sirdaryo viloyati IIB bilan hamkorlikda “Sirdaryo” YPX maskanida tezkor tadbir o‘tkazilgan. Unda Qashqadaryodan Toshkent viloyati tomon kelayotgan Qarshi shahrida yashovchi 36 yoshli shaxs boshqaruvidagi Nexia rusumli avtomashina to‘xtatilib, ko‘zdan kechirilgan.
Natijada, avtomashinaning yukxonasiga yashirib qo‘yilgan 4 kilogramm 534 gramm gashish giyohvandlik vositasi aniqlanib, protsessual tartibda rasmiylashtirib olingan. Ma’lum bo‘lishicha, ushbu fuqaro tojikistonlik narkosavdogar tomonidan kontrabanda yo‘li bilan yuborilgan narkotik moddalarni xufiya joylarga yashirib, mijozlarga sotish bilan shug‘ullanib kelgan.
Dastlabki surishtiruv harakatlari davomida uni Toshkent shahrida yashovchi, muqaddam sudlangan sherigi (1977-yilda tug‘ilgan) Zangiota tumanida kutib turgani ma’lum bo‘lib, u ham qo‘lga olingan.
Shuningdek, tezkor-qidiruv tadbirlari doirasida ularning yana bir sherigi, Qarshi shahrida yashovchi 42 yoshli shaxsning yashash xonadonidan 11 kilogramm 168 gashish giyohvandlik vositasi o‘rnatilgan tartibda rasmiylashtirib olingan. O‘tkazilgan tezkor tadbirlar natijasida jami 15 kilogramm 702 gramm gashish moddasi musodara qilingan.
Hozirda mazkur shaxslarga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
Avvalroq Farg‘onada tomorqasida 100 tup ko‘knori yetishtirayotgan shaxs aniqlangani, Toshkent shahri va viloyatida kuchli ta’sir qiluvchi dorilar savdosi bilan shug‘ullangan 9 kishi ushlangani to‘g‘risida xabar berilgandi.
Izoh (0)