Шимолий Корея мамлакат раҳбарининг АҚШ президенти Дональд Трамп билан янги учрашуви фақат бир шарт билан — Вашингтон КХДРни расман ядровий давлат сифатида тан олсагина амалга ошиши мумкин. Бу ҳақда Шимолий Корея раҳбарининг синглиси ва Меҳнат партияси Марказий қўмитаси бўлим директор ўринбосари Ким Ё Чжон ма`лум қилган.
“КХДРнинг ядровий давлат сифатидаги қайтариб бўлмас мақомини тан олиш ва унинг имкониятлари ҳамда геосиёсий муҳити тубдан ўзгарганини тушуниш келажакдаги ҳар қандай музокаралар учун дастлабки шарт бўлиши керак. Ҳеч ким бу ҳақиқатни инкор эта олмайди ва уни паст баҳоламаслиги лозим”, деди Ким хоним.
Баёнот Оқ уйнинг Пхеньян билан мулоқотга тайёрлиги ҳақидаги изоҳлари фонида янграган. Ким бу сўзларни “ўтмишга бир томонлама баҳо бериш” деб атаган ва “2025 йил 2018 ёки 2019 йил эмаслигини” эслатиб ўтган. Ўша пайтда Дональд Трамп ва Ким Чен Ин ўртасида учта тарихий учрашув, жумладан, Сингапур ва Ханой саммитлари, шунингдек, қуролсизлантирилган ҳудуддаги музокаралар бўлиб ўтган эди.
Ким Трамп ва Шимолий Корея раҳбари ўртасидаги шахсий муносабатлар “ёмон бўлмаганини” тан олган.
“АҚШ ўзгарган воқеликни эътиборсиз қолдириб, ядросизланишни талаб қилишда давом этса, бундай алоқаларнинг ҳеч қандай маъноси йўқ”, дейди у.
Унинг айтишича, агар Вашингтон янги шартларни қабул қилмаса, унда музокаралар Америка томонининг хомхаёлигина бўлиб қолади.
Изоҳ (0)