Самарқанд вилоятида камбағаллик даражаси етти ойда 1,1 фоизга қисқарди

Жорий йил бошидан бери ҳудудда камбағаллик даражаси 7,5 фоиздан 6,4 фоизга пасайди. Бу ҳақда 30 июль куни президент Шавкат Мирзиёев ўтказган йиғилишда ахборот берилди.

Президент ахборот хизмати хабарига кўра, охирги саккиз йилда Самарқанд вилоятида 1 минг 132 та кўп қаватли уй қурилган. Жами 56 минг оиланинг турмуш шароити яхшиланган. Мактабгача таълим қамрови 21 фоиздан 73 фоизга, олий таълимда 10 фоиздан 45 фоизга етган.

Иқтисодиётда тўқимачилик, металлургия, электр техникаси, қурилиш материаллари, туризм жадал ривожланмоқда. Бунёдкорлик, йирик лойиҳалар ва юқори даромадли иш ўринлари аҳолининг эртанги кунга ишончини оширмоқда.

“Вилоятда камбағаллик даражаси йил бошидан бери 7,5 фоиздан 6,4 фоизга камайган. Йил якунигача 150 минг одамни ишга жойлаб, 90 минг аҳолини камбағалликдан чиқариш мақсад қилинган”, дейилади манбада.

Саккиз йил давомида ҳудудда саноат маҳсулотлари 1,7 баробар ўсиб, ҳозир 45 триллион сўмдан ошган. Лекин бу натижаларнинг 37 фоизи Самарқанд шаҳрига, 23 фоизи Жомбой, Самарқанд ва Ургут туманларига тўғри келади. Қўшработ, Пайариқ ва Нурободда саноат нисбатан ривожланмаган.

“Нуробод туманида 115 гектарда махсус саноат зонаси ташкил қилиш таклиф этилмоқда. У ерда 472 миллион долларлик инвестиция лойиҳалари амалга оширилиб, 1 минг 200 та иш ўрни яратилади. Қўшработ туманида хитойлик инвесторнинг 40 миллион доллар тўғридан-тўғри сармояси ҳисобига гранит тошини қазиб олиш ва қайта ишлаш мўлжалланган. Булунғурлик тадбиркор “ин витро” лаборатория ташкил этиб, картошка уруғи бўйича бренд яратишга киришган. Туманда 100 миллион долларлик биофармацевтика корхонасини ишга тушириш ҳам режалаштирилган”, дея қайд этилган Президент матбуот хизмати хабарида.

Таҳлилга кўра, вилоятда 1 миллиард 200 миллион долларлик 14 та янги лойиҳа шакллантирилган. Уларнинг натижасида 12 минг иш ўрни, 82 миллион долларлик экспорт имконияти очилиши кўзда тутилган.

Президент бу ташаббусларни қўллаб-қувватлаб, лойиҳаларни жадаллаштириш бўйича кўрсатмалар берган. Ҳар бир туман-шаҳарнинг инвестицион жозибадорлиги ва экспорт имкониятларини тенгма-тенг ошириш зарурлиги таъкидланган.