М-39 халқаро автомобиль йўлини Термиз тумани «Янги ҳаёт» МФЙ ҳудудида ҳаракатланиб кетаётган Damas 25 нафар боғча боласини олиб кетаётганида тўхтатилди. Бу ҳақда Сурхондарё вилояти ЙҲХБ ахборот хизмати хабар берди.
Аниқланишича, Damas ҳайдовчиси боғча тарбиячиси билан бирга 25 нафар болани уйларни тарқатиш учун уларни транспорт воситасига миндирган.
ЙҲХБ видеоҳисоботида инспекторлардан бири болаларга бирор нарса бўлса, ота-оналарга қандай жавоб беришини сўраганида, тарбиячи «Ҳа, энди, ишлашимиз керак-ку», — дея жавоб қайтарган. Унинг сўзларига кўра, шундай йўл билан «қамров»ни таъминлаб, болаларни тарбиялашга олган. Болалар хавфсизлигини эса уларни олиб келиб, олиб кетиб турган ҳайдовчи таъминлайди.
Боғча болаларнинг ҳаммаси боғчага топширилган, ота-оналарнинг ўзлари уларни олиб кетиши бўйича мудира билан тушунтириш ишлари олиб борилган. Damas ҳайдовчиси автомобилнинг олд эшигига рухсатсиз қорайтирилган парда ўрнатгани учун жарима майдончасига жойлаштирилган ва унга нисбатан Маъмурий жавобгарлик тўғрисидаги кодекснинг 126-моддасига (кўзгусимон ва (ёки) туси ўзгартирилган (қорайтирилган) ойнали, шунингдек теварак-атрофни кўришни чеклайдиган қопламали транспорт воситаларидан фойдаланиш) асосан баённома расмийлаштирилган.
Эслатиб ўтамиз, 2021 йилда Фарғонада ҳайдовчи Damas’да 28 нафар боғча боласини олиб кетаётгани аниқланганди.
Изоҳ (0)