АҚШ давлат котиби Энтони Блинкен бошқа давлатларни Россиядан қўшимча энергия ресурсларни харид қилмасликка чақирди. Бу ҳақда у АҚШ мудофаа вазири Ллойд Остин, Ҳиндистон ташқи ишлар вазири Субраманиям Жайшанкар ва Ҳиндистон мудофаа вазири Ражнат Сингх билан ўтказилган қўшма матбуот анжуманида маълум қилди.
«Ҳар бир давлатда вазият турлича, эҳтиёжлари, талаблари ҳар хил, аммо биз иттифоқдошларимиз ва шерикларимиз Россиядан энергия ташувчилар харидини оширмаслигига умид қиламиз», — дейди Блинкен.
Оқ уйнинг юқори мартабали амалдори президент Жо Байден ва Ҳиндистон бош вазири Нарендра Модининг онлайн учрашуви якунлари бўйича АҚШ бошқа мамлакатлар худди Вашингтон каби Россия энергия ташувчилари импортидан воз кеча олмаслигини яхши тушинишларини маълум қилганини таъкидлаган. Унинг сўзларига кўра, давлатлар қандай йўл тутиш кераклигини ўзлари ҳал қилиши лозим. Шу билан бирга, АҚШ Ҳиндистон Россиядан энергия ташувчилар импортини ошириши керак эмас, деб ҳисоблайди. Амалдорнинг қайд этишича, Ҳиндистон Россия нефтининг йирик истеъмолчиси ҳисобланмайди. Вашингтоннинг ҳисоб-китобларига кўра, мамлакат импорти умумий импортнинг 1-2 фоизини ташкил этади. Америка томони етказиб беришни диверсификация қилишда Ҳиндистонни қўллаб-қувватлашга ваъда берган.
АҚШ Давлат департаменти раҳбари, шунингдек, Россиядан қурол сотиб олиш бўйича янги битимларни имзоламасликка чақирган. 2021 йилнинг ноябрида Россия АҚШ санкцияларига қарамай, Ҳиндистонга C-400 «Триумф» зенит-ракета мажмуаларини ектказиб беришни бошлаган. Давлат котибининг Жанубий ва Марказий Осиё бўйича ёрдамчиси Дональд Лу президент Байден CAATSA қонуни доирасида Ҳиндистонга нисбатан санкциялар қўллаш ёки қўлламаслик бўйича қарор қабул қилиши кераклигини айтган. Ушбу қонун АҚШ санкциялари остида бўлган россиялик шахсларга «сезиларли транзакциялар»ни амалга оширишда иштирок этган Америка фуқароси ва компанияси бўлмаганларга қарши чеклов чораларини жорий этиш мажбуриятини юклайди.
Март охирида Bloomberg агентлиги Россия Ҳиндистонга Urals маркали нефть харидини ошириш ва бир баррелига 35 долларгача чегирма билан сотиб олиш таклифини бергани ҳақида ёзганди. Биринчи етказиб бериш ҳажми 15 миллион баррель даражасида муҳокама қилинган. Россия тўловларни рублда амалга оширишни таклиф қилган. Апрель бошида The Hindu газетаси Ҳиндистон май ойида етказиб бериш шарти билан 2 миллион баррель нефть буюртма қилганини ёзган эди. 24 февралндан буён мамлакат Россиядан 16 миллион баррелга яқин нефть сотиб олган, бу 2021 йил давомида харид қилинган жами нефть ҳажмига тенг.
Изоҳ (0)