Макрон қандай ҳолатда Украинага ташриф буюришини айтди

Франция президенти Эммануэль Макрон, агар Украинадаги вазиятни ҳал қилишда фойдали бўлса, Киев ёки Украинанинг бошқа шаҳрига ташриф буюришга тайёрлигини маълум қилди. Бу ҳақда BFMTV хабар бермоқда.

«Мен Киевга ёки Украинанинг исталган бошқа шаҳрига боришга тайёрман, лекин буни шунчаки элчихонага ташриф учун қилмайман. Агар ушбу ташриф мавжуд вазиятда қандайдир натижаларга олиб келса, фойдали бўлса, уни амалга ошираман», — деди у.

Макроннинг сўзларига кўра, агар унинг ташрифи Украина президенти Владимир Зеленский ва Россия президенти Владимир Путин ўртасидаги мулоқотга имкон берса, у мазкур қадамни қўйишга тайёр.

Ўтган ҳафта бир неча европалик сиёсатчилар Киевга ташриф буюрди. Хусусан, 8 апрель куни Европа дипломатияси раҳбари Жозеп Боррел Украинага келди. У билан бирга Европа комиссияси раҳбари Урсула фон дер Ляен мамлакатга ташриф буюрди.

Боррел Украинадаги жанговар ҳаракатлар тугашини тилаб, «бу урушда жанг майдонида ғалаба қозониш керак», деб таъкидлади. У Брюссель Киевга қурол сотиб олиш учун қўшимча 500 миллион евро ажратганини қайд этди.

Боррелнинг сўзларини Россия ТИВ расмий вакили Мария Захарова танқид қилди. Telegram’да у Европа Иттифоқи иқтисодий ташкилотдан «НАТОнинг иқтисодий алоқалар бўлими»га айлангани ҳақида ёзди.

Урсула фон дер Ляен эса Зеленскийга мамлакатга Европа Иттифоқига қўшилиш учун номзод мақомини беришда мажбурий бўлган сўровномани топширди. Унинг таъкидлашича, ЕИ Украинанинг аъзолик аризасини шу йилнинг ёзида кўриб чиқишни режалаштирмоқда.

9 апрель куни Киевга Буюк Британия бош вазири Борис Жонсон ташриф буюрди. У Зеленский билан учрашиб, мамлакатга 120 та зирҳли техника ва кемаларга қарши тизимлар кўринишидаги ҳарбий ёрдам ҳамда Жаҳон банкидан қўшимча 500 миллион доллар кредит кафолати беришни ваъда қилди. Шунингдек, Британия бош вазири Россия босқини тугагандан кейин Киев ва Киев вилоятини тиклашда ёрдам беришга тайёрлигини билдирди.

Шу куни Австрия канцлери Карл Нехаммер ҳам Зеленский билан музокаралар ўтказиш учун Киевга келди, сўнг Киев вилоятининг Буча шаҳрига ташриф буюрди. Австрияда унинг сафари танқид қилинди, деб ёзади Kronen Zeitung, чунки Украина билан бирдамлик намойиши мамлакатнинг нейтрал сиёсатини шубҳа остига қўйган.

11 апрель куни Нехаммер Москвага ташриф буюрди ва Путин билан музокаралар ўтказди. Кремль матбуот котиби Дмитрий Песков уларнинг учрашуви қисқа бўлганини айтди. Нехаммер Россия президенти билан «жуда қаттиқ ва очиқ суҳбат» ўтказганини таъкидлади.