«Жасадлар кўчаларни гиламдек қоплаган». Мариупол мэри шаҳарда 10 мингдан ортиқ тинч аҳоли ҳалок бўлганини айтди

Мариупол мэри Вадим Бойченконинг Associated Press агентлигига айтишича, Россия қўшинлари шаҳарни қамал қила бошлаганидан бери Мариуполда 10 мингдан ортиқ тинч аҳоли ҳалок бўлган. Мэрнинг сўзларига кўра, қурбонлар сони 20 минг кишидан ортиқ бўлиши ҳам мумкин, чунки Мариупол аҳолисининг жасадлари «кўчаларни гиламдек қоплаган».

Бойченко, шунингдек, Россия вакиллари ўлганларнинг жасадларини йиғиб, савдо марказидаги музлатгичларда сақлаётганини даъво қилмоқда. Апрель ойи бошида Мариупол шаҳар кенгаши шаҳарда Россиянинг кўчма крематорияси иш бошлаганини маълум қилганди.

Мариуполда 120 минг тинч аҳоли қолган, дейди Бойченко. Мэрнинг сўзларига кўра, шаҳардан фақат россиялик айирмачилар назорат қилаётган ҳудуддаги «фильтрлаш лагерлари»дан ўтганлар қўйиб юборилмоқда. «Фильтрлаш лагерлари»дан кейин одамлар Россия ҳудудларига жўнатилмоқда.

Бойченконинг айтишича, «фильтрдан» ўтмаган одамлар учун қўлбола қамоқхоналар ташкил этилган ва камида 33 минг киши Россияга олиб кетилган.

Бойченко ўзи Мариуполда эмаслигини, аммо Украинадан чиқиб кетмаганини айтди. У шаҳарда содир бўлаётган воқеалар ҳақида бир неча манбалардан маълумот олганини таъкидлади, бироқ уларни ошкор қилмади.

Мариупол март ойи бошидан бери Россия қамалида. 7 апрель куни Мариупол мэри Вадим Бойченко шаҳарда камида 5 минг киши ҳалок бўлганини айтганди. Украина президенти Владимир Зеленский 11 апрель куни Мариуполда уруш пайтида ўн минглаб одамлар қурбон бўлгани ҳақида гапирди.