Бельгияда BА.4 номини олган коронавируснинг омикрон штаммининг янги варианти билан илк касалланиш ҳолат қайд этилди. Бу ҳақда Леувен католик университети вирусологлари Марк Ван Ранст ва Пет Масс маълум қилди, деб хабар беради «Интерфакс».
«Вируслар мутацияларни тўплайди, улар доим шундай қилади. Янги вариантлар ҳали яна пайдо бўлади», — дейди Ван Ранст.
Экспертнинг тушунтиришича, коронавируснинг «мутлақо янги вариантларидан кўра, омикроннинг қуйи версиялари маъқул».
Мақолада қайд этилишича, омикроннинг BА.4 ва BА.5 вариантлари Жанубий Африка, Ботсвана, Германия, Дания ва Буюк Британияда аниқланган. Бельгияда омикроннинг BА.5 версияси ҳали аниқланмаган.
Таъкидланишича, омикрон штаммининг янги вариантларининг қатор давлатларда пайдо бўлиши касалланиш, шифохонага мурожаат қилишлар ёки ўлим ҳолатларининг сезиларли даражада ортишига олиб келмаган.
Эслатиб ўтамиз, коронавируснинг янги омикрон штамми биринчи марта 2021 йилнинг 11 ноябрь куни Жанубий Африкада топилган. Британиялик олимлар янги штамм тарқалиш тезлиги туфайли аввалгиларига, жумладан, дельтага қараганда хавфлироқ бўлиши мумкинлигини таъкидлаганди. Жаҳон соғлиқни сақлаш ташкилоти мавжуд вакциналар ушбу штаммга қарши самарасиз бўлиши мумкин, деган шубҳалар туфайли омикронни хавфли деб тан олган эди. 2022 йилнинг январь ўрталарида Швеция жанубидаги Уппсала шаҳрида омикрон штаммининг мутация, февраль ўрталарида эса Польшада омикроннинг иккита янги варианти аниқланганди.
Изоҳ (0)