Австрия канцлери Карл Нехаммер Россия президенти Владимир Путин билан Ново-Огарёвадаги музокараларини «жуда ҳам тўғридан-тўғри, очиқ ва қаттиқ» дея атаб, бу «дўстона ташриф бўлмаганини» таъкидлади. Бу ҳақда Австриянинг Kronen Zeitung газетаси Нехаммер канцеляриясига таяниб, хабар берди.
Учрашув давомида канцлер Украинадаги ҳарбий жиноятлар мавзусини кўтариб, айбдорлар жазоланиши зарурлигини қайд этган. Нехаммер, шунингдек, «Украинада одамлар ўлишни давом этар экан», Россияга қарши санкциялар ўз кучида қолиши ва тобора кучайтирилишини маълум қилган.
«Лекин Путинга айтган энг муҳим гапим шунда эдики, уруш охир-оқибат якунланиши керак, чунки урушда ҳар икки томон ҳам мағлуб бўлади», — дейди у.
Эндиликда Вена Путин билан музокаралари ҳақида Европадаги шерикларини хабардор қилади. Россия томони учрашувга ҳозирча изоҳ бермаган.
Путин ва Нехаммер ўртасидаги музокаралар 11 апрель куни кечқурун бўлиб ўтди. Австрия ОАВларининг маълумотларига кўра, учрашув 1,5 соатга давом этган, суҳбатнинг ўзи — 75 дақиқа. Музокаралар матбуот режими учун ёпиқ эшиклар ортида ўтган, бошланишидан олдин протокол учун суратга олишлар ҳам, якунда матбуот анжумани ҳам бўлмаган
Нехаммер Россия Украинага ҳужум бошлагандан бери Путин билан шахсан учрашган биринчи европалик етакчи бўлди.
Изоҳ (0)