Покистон парламенти Шаҳбоз Шарифни мамлакатнинг янги бош вазири этиб сайлади, деб ёзмоқда Reuters.
Покистон мусулмон лигаси (ПМЛ-Н) партиясининг раҳбари Шаҳбоз Шариф мамлакат Миллий ассамблеясида (парламент қуйи палатаси) овоз бериш орқали сайланди. Мухолифатчи блок номзодини ёқлаб 174 нафар депутат овоз берди. У Покистон тарихидаги 23-бош вазир бўлди.
70 ёшли Шаҳбоз Шариф 2018 йилда Имрон Хон ҳокимият тепасига келгунига қадар Покистоннинг аҳоли энг зич жойлашган Панжоб вилоятида бош вазир лавозимида ишлаган.
Бош вазирлик учун яна бир номзод, Покистоннинг амалдаги ташқи ишлар вазири Шоҳ Маҳмуд Қурейшининг маълум қилишича, собиқ бош вазир Имрон Хон бошчилигидаги «Адолат ҳаракати» (Теҳрик-э-Инсаф) партияси парламентдаги овоз беришни бойкот қилган ва иш ташлаш эълон қилган. Хон ва унинг партиясидаги депутатларнинг аксарияти сайловдан олдин истеъфога чиққан.
Сайлангандан кейинги нутқида Шариф Хоннинг истеъфога чиққан ҳукуматини иқтисодни нотўғри бошқаришда айблади ва ҳаммасини қайта йўлга қўйиш янги ҳукумат учун катта муаммо бўлишини айтди.
Имрон Хон ўзининг бош вазирликдан четлатилишида ҳамон хорижнинг аралашувини айбламоқда. Унинг сўзларига кўра, Афғонистон, Россия ва Хитой бўйича ташқи сиёсатдаги позициялари туфайли унинг рақиблари АҚШ билан тил бириктирган. Вашингтон, ўз навбатида, бу айбловларни қатъиян рад этди.
Аввалроқ Покистонда собиқ бош вазир Имрон Хон ва унинг Теҳрик-и-Инсаф партиясининг ўн минглаб тарафдорлари ҳукумат алмашинувига қарши оммавий норозилик намойишларига чиққанди.
Изоҳ (0)