АҚШнинг Ашхободдаги элчихонаси ўзининг Facebook’даги саҳифаси орқали Жо Байденнинг Туркманистон президенти Сердар Бердимуҳамедовни Наврўз байрами билан табриклаган хатини эълон қилди.
«Ҳурматли жаноб президент!
Туркманистоннинг учинчи президенти бўлганингизни инобатга олиб, сизга, оилангиз ва мамлакат халқига Наврўз байрами қувончли ва фаровон бўлишини тилайман. Тинчлик ва янгиланиш кунида Қўшма Штатлар ҳамда бутун дунё бўйлаб кўплаб одамлар сиз билан бирга ушбу ажойиб байрамни нишонламоқда», — дейилади хатда.
«Хроника Туркменистана» нашрининг ёзишича, Байденнинг мактубида Бердимуҳамедовнинг президентлик лавозимига сайлангани учун табрик йўқ. «Сайловларда ғалаба қозонганингиз» ёки «сайланганингиз» ўрнига «сиз президент бўлганингиз» дея қизиқ нутқ услуби танланган.
Шу билан бирга, элчихона хабарида таъкидланишича, улар «Турманистан: олтин аср» давлат нашри томонидан таржима қилинган мактубни эълон қилган. Оригинал инглиз тилидаги версияси келтирилмаган.
Аввалроқ АҚШ Давлат департаменти ЕХҲТ хулосаларига таянган ҳолда Туркманистонда ўтказилган президентлик сайловларини қонуний деб тан олмаган ва туркман ҳукумати эркин, адолатли ва рақобатбардош сайловларни таъминлай олмаганини маълум қилган.
Эслатиб ўтамиз, 11 февраль куни Туркманистон парламенти олий палатасининг навбатдан ташқари йиғилишида мамлакатни 15 йилдан бери бошқариб келаётган Гурбангули Бердимуҳамедов раҳбарликни ёшларга топшириш ва фаолиятини Халқ маслаҳати раиси сифатида давом эттириш ниятини маълум қилганди. 12 март куни бўлиб ўтган муддатидан олдинги президентлик сайловларида Гурбангули Бердимуҳамедовнинг ўғли Сердар Бердимуҳамедов ғалаба қозонди — у 72,97 фоиз овоз тўплаган.
Изоҳ (0)