Европа Иттифоқи давлатлари Украинага ёрдам беришда давом этиб, уруш тугаганидан кейин ҳам мамлакатни тиклашда ёрдам беради. Бу ҳақда Иттифоқ баёнотида айтилган, деб ёзмоқда «РБК».
«Шу мақсадда Европа Кенгаши Украина билан бирдамлик траст фондини ташкил этишга розилик билдиради ва халқаро ҳамкорларини унда иштирок этишга таклиф қилади», — дейилади ҳужжатда.
Бундан ташқари, Евроиттифоқ мамлакатлари ва ҳукумат раҳбарлари Еврокомиссияни «зарур ислоҳотларни амалга ошириш учун Украинага техник ёрдам кўрсатишни давом эттириш»га чақирди.
Шу билан бирга, Европа Иттифоқи агар зарурат туғилса, Россия ва Беларусга қарши янги санкциялар жорий этишга, шунингдек, мавжуд санкциялар режимини четлаб ўтиш йўлларини бекитишга тайёрлигини билдирди.
Аввалроқ Россия кенгаши раисининг биринчи ўринбосари, «Ягона Россия» Бош кенгаши котиби Андрей Турчак Россия Украина ҳудудида жойлашган Донецк вилоятидаги Мариуполни қайта тиклаб беришини айтганди. Депутатнинг сўзларига кўра, жанглар натижасида шаҳар жиддий зарар кўрган, юзлаб уйлар вайрон бўлган ёки ёниб кетган.
Россиянинг ҳарбий амалиёти тугаши билан «қурувчиларимиз дарҳол Мариуполга киради», деб ишонтирган у. «Ҳаммамиз киришамиз. Уйлар, корхоналар, порт ва мактабларни, болалар боғчаларини тиклаймиз», — деган Турчак.
Изоҳ (0)