Украинадаги махсус операцияда иштирок этаётган чеченистонлик ҳарбийлар Мариуполнинг шарқий қисмида жойлашган Левобережний туманини назорат остига олди. Бу ҳақда Чеченистон раҳбари Рамзан Қодиров ўзининг Telegram’даги канали орқали маълум қилди.
«Жангчиларимиз Мариуполнинг шарқий қисмида жойлашган ва ‘Азовстал’ саноат зонасидан ажралиб қолган бутун Левобережний туманини ‘банда’лардан тозалади. Бу ерда озод этилган охирги бино — Левобережний тумани округ прокуратураси — жангчилар байроқни илди», — деб ёзади Қодиров.
Унинг сўзларига кўра, айнан шу чечен бўлинмаси 100 мингдан ортиқ аҳоли истиқомат қиладиган шаҳарнинг шарқий қисмидаги даҳаларни «тўлиқ тозалаган». «Илгари Левобережний вилоятида фаолият юритган ‘бандитлар’ гуруҳининг сўнгги гуруҳлари йўқотишларга учраб, ғарбий йўналишда қочиб кетди», — деб қўшимча қилади у.
24 март куни Чеченистон раҳбари чечен жанчилари томонидан Мариупол маъмурияти биноси назорат остига олинганини маълум қилганди.
Таъкидлаш керакки, Мариупол атрофида ҳудудларда жанговар ҳаракатлари 25 февраль куни — махсус ҳарбий операциянинг эртаси кунидан бошланган. 11 март куни Мариупол қамалда қолди. 18 мартда Россия Мудофаа вазирлиги Мариупол марказида жанглар кетаётганини маълум қилди. 21 март куни эса Қодиров чеченистонлик ҳарбий хизматчилар Мариуполга ҳужум бошлаганини билдирди. Унинг сўзларига кўра, ҳужумга Россия Давлат думаси депутати Адам Делимханов бошчилик қилмоқда.
Аввалроқ Россия Харьков вилоятидаги Изюм шаҳри эгалланганини маълум қилган. Вилоят раҳбари эса жанглар давом этаётганини таъкидламоқда.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)