АҚШ 100 минг украиналик қочқинни қабул қилишга тайёр — Reuters

АҚШ Украинадаги можароларнинг авж олиши сабаб мамлакатни тарк этган 100 минг нафаргача украиналикни қабул қилишни режалаштирмоқда, деб ёзади Reuters.

Хабар қилинишича, украиналикларнинг бир қисми қочқинлар дастури орқали қабул қилинади, бошқалари эса оилавий визалар ёки «гуманитар пароль» деб аталадиган жараён орқали АҚШ чегарасини кесиб ўтиши мумкин бўлади. Бундай пароль шошилинч тиббий ёки гуманитар сабабларга кўра, шунингдек, бошқа фавқулодда вазиятларда ҳар қандай чет эл фуқаросига АҚШга кириш учун берилиши мумкин.

Reuters маълумотларига кўра, Америка томони ўз ҳудудига 100 минг нафаргача муҳожирни киритишга тайёр. Шу билан бирга, АҚШда украиналик қочқинлар учун иммиграция ва транспорт логистикаси қандай йўлга қўйилиши ҳозирча маълум эмас.

Бирлашган Миллатлар Ташкилотининг қочқинлар ишлари бўйича агентлигига кўра, ҳарбий ҳаракатлар бошланган 24- февралдан бери 3,5 миллиондан ортиқ одам Украинани тарк этган.

Аввалроқ БМТ жараён кўлами ва тезлигидан келиб чиқиб, содир бўлаётган воқеаларни Иккинчи жаҳон урушидан кейинги энг йирик миграция инқирози деб атаганди. Шу билан бирга, хорижга чиқиб кетган украиналик қочқинларнинг деярли ярми болалар.