AQSHning Ashxoboddagi elchixonasi o‘zining Facebook’dagi sahifasi orqali Jo Baydenning Turkmaniston prezidenti Serdar Berdimuhamedovni Navro‘z bayrami bilan tabriklagan xatini e’lon qildi.
“Hurmatli janob prezident!
Turkmanistonning uchinchi prezidenti bo‘lganingizni inobatga olib, sizga, oilangiz va mamlakat xalqiga Navro‘z bayrami quvonchli va farovon bo‘lishini tilayman. Tinchlik va yangilanish kunida Qo‘shma Shtatlar hamda butun dunyo bo‘ylab ko‘plab odamlar siz bilan birga ushbu ajoyib bayramni nishonlamoqda”, — deyiladi xatda.
“Xronika Turkmenistana” nashrining yozishicha, Baydenning maktubida Berdimuhamedovning prezidentlik lavozimiga saylangani uchun tabrik yo‘q. “Saylovlarda g‘alaba qozonganingiz” yoki “saylanganingiz” o‘rniga “siz prezident bo‘lganingiz” deya qiziq nutq uslubi tanlangan.
Shu bilan birga, elchixona xabarida ta’kidlanishicha, ular “Turmanistan: oltin asr” davlat nashri tomonidan tarjima qilingan maktubni e’lon qilgan. Original ingliz tilidagi versiyasi keltirilmagan.
Avvalroq AQSH Davlat departamenti YXHT xulosalariga tayangan holda Turkmanistonda o‘tkazilgan prezidentlik saylovlarini qonuniy deb tan olmagan va turkman hukumati erkin, adolatli va raqobatbardosh saylovlarni ta’minlay olmaganini ma’lum qilgan.
Eslatib o‘tamiz, 11-fevral kuni Turkmaniston parlamenti oliy palatasining navbatdan tashqari yig‘ilishida mamlakatni 15 yildan beri boshqarib kelayotgan Gurbanguli Berdimuhamedov rahbarlikni yoshlarga topshirish va faoliyatini Xalq maslahati raisi sifatida davom ettirish niyatini ma’lum qilgandi. 12-mart kuni bo‘lib o‘tgan muddatidan oldingi prezidentlik saylovlarida Gurbanguli Berdimuhamedovning o‘g‘li Serdar Berdimuhamedov g‘alaba qozondi — u 72,97 foiz ovoz to‘plagan.
Izoh (0)