Ганада содир бўлган кучли портлаш оқибатида 500 дан ортиқ бино вайрон бўлди, деб хабар беради The Guardian. Таъкидланишича, фожиа оқибатида камида 17 киши ҳалок бўлган.
Маълумотларга кўра, портлаш кончилар шаҳри Богоза яқинидаги Апиати қишлоғида содир бўлган. У ерда конда ишлатиладиган портлатувчи моддалар ортилган юк машинаси мотоцикл билан тўқнашиб кетган.
Мазкур юк машинаси Торонтодаги Kinross компаниясига тегишли Чирано олтин кони томон ҳаракатланаётган бўлган. Kinross вакиллари кўнгилсиз ҳодиса ростдан содир бўлганини тасдиқлаган ва у кондан 140 километр узоқликда юз берганини маълум қилган.
Гувоҳларнинг сўзларига кўра, тўқнашувдан кейин ҳайдовчи — авария иштирокчиси — мотоцикл ёна бошлаганини кўриб, маҳаллий аҳолини яшириниш ҳақида огоҳлантирмоқчи бўлган.
Фавқулодда хизматларнинг маълумотлари бўйича, камида 57 киши турли жароҳатлар билан маҳаллий шифохоналарга етказилган. Яқин атрофдаги шифохона ва поликлиникалар жабрланганлар билан тўлган. Полиция атрофдаги мактаб ва черковларни қурбонлар учун очишни сўраган.
Табиий офатларга қарши курашиш бўйича миллий ташкилот бош директори ўринбосари Седжи Саджи Амедонунинг сўзларига кўра, портлаш оқибатида 500 дан ортиқ бино вайрон бўлган.
Аввалроқ Афғонистон шарқида юз берган портлашда 9 нафар мактаб ўқувчиси ҳалок бўлгани, Нью-Йоркда газ портлаши оқибатида кўп қаватли уйнинг бир қисми қулаб тушгани, Гаитида ёнилғи ортилган автоцистерна аварияга учраб, портлаши оқибатда 40 дан ортиқ одам ҳалок бўлгани тўғрисида хабар берилганди.
Изоҳ (0)