Либерия пойтахти Монровияда бир гуруҳ қуролланган эркаклар черковга ҳужум уюштирди. Содир этилган босқинчилик оқибатида 29 киши ҳалок бўлган, уларнинг 11 нафари болалар, деб хабар беради Reuters.
Фожиа 19 январь куни кечаси Нью-Кру-Таун туманида содир бўлган. Ҳужум вақтида черковда юзлаб одам бўлгани айтилмоқда.
«Тесака (откир тиғли совуқ қурол) ва бошқа қуролларни кўтариб олган эркаклар гуруҳи оламонга яқинлашиб келаётганини кўрдик… Қочиш вақтида айрим одамлар йиқилди, бошқалар уларни босиб кетди», — дейди гувоҳлардан бири. Унинг таъкидлашича, босқинчилар ибодат учун келган фуқароларни ўмармоқчи бўлган.
Шифокорларнинг маълумотларига кўра, жароҳат олганларнинг бир қанчаси оғир аҳволда, шу сабабли қурбонлар сони ортиши мумкин. Маҳаллий ОАВларнинг ёзишича, тўполонда бир ҳомиладор аёл ҳам ҳалок бўлган.
Либерия президенти Жорж Веа воқеа жойига ташриф буюриб, мамлакатда ҳалок бўлганлар хотирасига уч кунлик мотам эълон қилган.
Ижтимоий тармоқларда гувоҳлар фожиа жойидаги кадрларни, шунингдек, жарбланган ва ҳалок бўлганларнинг оёқ кийимлари ҳамда уст-бошлари тўпланган суратларни эълон қилмоқда.
Аввалроқ Нигериядаги мактабда содир бўлган ёнғинда 25 бола ҳалок бўлгани, шунингдек, Нигерияда қуролли шахсларнинг масжидга қилган ҳужуми оқибатида 18 киши қурбон бўлгани тўғрисида хабар берилганди.
Изоҳ (0)