ИШИД аъзолари Суриянинг Хасеке вилоятидаги қамоқхонага ҳужум уюштириб, у ерда ҳибсда сақланаётган жангариларни озод этишга уринди. Бу ҳақда «Сурия демократик кучлари» (СДК) курд жангари отрядларининг баёнотига таяниб, Reuters хабар берди. Шунингдек, қамоқхонага уюштирилган ҳужум ҳақида Суриянинг SANA давлат агентлиги ҳам ёзган.
Унинг маълумотларига кўра, портловчи қурилмалар ўрнатилган иккита машина ИШИД тарафдорлари бўлган жангарилар сақланаётган қамоқхона дарвозаси олдида портлаган. Шундан сўнг, ҳужум уюштирганлар ва қамоқхона қўриқчилари ўртасида отишга юзага келган. Гувоҳларнинг айтишича, ушбу шахслар портлашлар ёрдамида деворда тешик очиб, маҳбусларнинг қочиб кетишга ёрдам бермоқчи бўлган.
СКД вакилларининг маълум қилинишича, ҳужум қайтарилган ва маҳбусларнинг қочиб кетишига йўл қўйилмаган.
Reuters’нинг ёзишича, тасдиқланмаган маълумотларга кўра, бир неча маҳбус ўлдирилган. Ҳужумга учраган қамоқхонада қанча маҳкум борлиги тўғрисида маълумот йўқ.
ИШИД жангарилари Сурияда босқинчилик ҳаракатларини давом эттирмоқда, хусусан, суриялик ҳарбий хизматчиларга ҳужумлар уюштирилмоқда. Январь бошида мамлакат жанубида содир бўлган ҳужум оқибатида беш нафар ҳарбий ҳалок бўлган, яна 20 нафари жароҳат олганди. SANA агентлигининг ёзишича, террорчилар ичида ҳарбий хизматчилар бўлган автобусни ўққа тутган.
Аввалроқ АҚШ ИШИДнинг Афғонистондаги бўлинмасига алоқадор афғонларга қарши санкциялар эълон қилгани, «Толибон» Қандаҳорда ИШИДнинг 3 нафар жангарисини йўқ қилгани, Ироқда ИШИД етакчиларидан бири ўлдирилгани тўғрисида хабар берилганди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)