Syerra-Leoneda benzovoz portlashi oqibatida halok bo‘lganlar soni 144 kishiga yetdi

G‘arbiy Afrika davlati Syerra-Leoneda 5-noyabr kuni yuk mashinasi bilan to‘qnashgan benzovozning portlashi oqibatida halok bo‘lganlar soni ortdi, deb yozmoqda Reuters.

Syerra-Leone Sog‘liqni saqlash vazirligining so‘nggi ma’lumotlariga ko‘ra, poytaxt Fritaunda yuz bergan mazkur portlash qurbonlarining soni 144 kishiga yetgan. Shuningdek, 57 kishi shifoxonada davolanmoqda, ulardan 11 nafarining ahvoli og‘ir.

Portlash shaharning Bay Bureh turar joy massivida sodir bo‘lgandi. Dastlab hodisa oqibatida 100 dan ortiq kishi halok bo‘lgani xabar qilindi. Qurbonlar sonining yuqoriligiga sabab — ko‘plab odamlar avtohalokatdan keyin yoqilg‘ini tekinga quyib olish uchun qulagan benzin sisternasi oldiga yugurgan. Hodisa vaqtida atrofda bo‘lgan kishilarning bir qanchasi kuygan va yaralangan. Portlash va yong‘in oqibatida o‘nlab binolar vayron bo‘lib, ikkita yoqilg‘i quyish shoxobchasi yonib ketgan.

Avgust oyida Livanda gaz tankeri portlab, hodisa oqibatida kamida 20 nafar odam halok bo‘lgan, 100 ga yaqin kishi turli darajada jarohatlangan edi. Oktabr oxirida Yamandagi xalqaro aeroport yaqinida mina qo‘yilgan avtomobil portlagani, oqibatda kamida 10 kishi halok bo‘lgani haqida xabar berilgan.