Александр Лукашенконинг қарори билан Беларусь конституциясига ўзгартириш киритиш бўйича референдум 2022 йилнинг 27 февраль куни ўтказилади. Бу ҳақда мамлакат президентининг матбуот хизмати хабар берди.
Овоз беришга мўлжалланган бюллетенда биргина савол бўлади: «Беларусь конституциясига ўзгартириш ва қўшимчалар киритилишини қабул қиласизми?». Референдумни ўтказиш бўйича қарор у расман эълон қилинганидан 10 кун ўтиб, кучга киради.
Референдум доирасида конституцияга киритиладиган барча ўзгартириш ва қўшимчалар Лукашенконинг қарорида келтирилган. Хусусан, Беларусь ҳукумати конституцияга бир киши Беларусь президенти лавозимига икки муддатдан ортиқ сайланмаслиги тўғрисидаги ўзгартиришни киритишни таклиф қилмоқда (ҳозирча бу борада чеклов йўқ).
Аввалроқ Беларусь президенти Александр Лукашенко бир-икки кундан кейин янги конституция лойиҳаси умумхалқ муҳокамасига тақдим этилишини айтганди. Лукашенконинг айтишича, конституция ўзгартириладиган бўлса, мамлакатдаги бошқарув тизими унга мувофиқ қайта қурилади.
Беларусда 2020 йил 9 августда бўлиб ўтган президентлик сайловларидан кейин бошланган норозилик намойишлари фонида Лукашенко конституцияга ўзгартириш киритиш зарурати ва президентлик ваколатларининг бир қисмини ҳокимиятнинг бошқа тармоқлари фойдасига қайта тақсимлашга тайёрлигини маълум қилган. Беларусда асосий қонуннинг янги таҳрири бўйича референдум 2022 йил февраль ойида бўлиб ўтиши хабар қилинганди.
Изоҳ (0)