Қўшма Штатлар суд ҳокимияти 2021 йилда Ryanair авиакомпанияси самолётини мажбуран қўндиришга алоқадор тўрт нафар Беларусь фуқаросига нисбатан айблов эълон қилди. Бу ҳақда АҚШ Адлия вазирлиги хабар берди.
«Беларусь расмийлари самолёт йўналишини Вильнюс ўрнига Минскка ўзгартириш ва қўнишига мажбурлаш учун хавф ҳақида сохта маълумотларни тайёрлаган. Самолётни Минскка йўналтиришдан мақсад беларус журналисти ва сиёсий фаолни қўлга олиш бўлган», — дейилади вазирлик хабарида.
АҚШ Адлия вазирлиги томонидан «Белаэронавигация» раҳбари Леонид Чуро, унинг ўринбосари Олег Казючиц ва Беларусь махсус хизматларининг икки ходимига «ҳаво қароқчилиги» айблови қўйилган. ОАВ маълумотларига кўра, уларнинг барчаси ҳозирда Беларусь ҳудудида.
Аввалроқ Халқаро фуқаролик авиацияси ташкилоти (ICAO) Ryanair авиакомпаниясининг 2021 йил май ойида Минск аэропортига фавқулодда қўндирилгани юзасидан суриштирув ҳисоботини тайёрлаганди. Ҳисоботда ҳодисанинг техник тафсилотлари, хусусан, «эксплуатацион тафсилотлар ва қабул қилинган чора-тадбирларнинг таҳлили» акс этган. 31 январда ICAO ҳисоботни муҳокама қилади ва кейинчалик қандай ишларни амалга ошириш борасида бир қарорга келади.
Ҳисоботнинг бир нусхасига эга «Новая газета» нашри ICAO тергов гуруҳининг Беларусь ҳукумати томонидан самолётнинг фавқулодда қўндирилишига сабаб бўлган аноним хат ҳақидаги кўрсатмаларда асосланмаган маълумотлар борлигини аниқлаган. Мактубда Ryanair рейсининг миналаштирилгани хабар қилинган.
Портлаш хавфи мавжудлиги ҳақидаги электрон хат Минск аэропортига маҳаллий вақт билан соат 12:56да келиб тушган ва бу вақтда самолётни фавқулодда қўндириш ишлари аллақачон бошланганди. Бироқ Минск халқаро ташкилотга мактубнинг соат 12:25 да келиб тушганлиги ҳақидаги скриншотни тақдим этган. Скриншот билан реал метамаълумотларни текширишнинг имкони йўқ, дея қайд этилган ICAO ҳисоботида.
Эслатиб ўтамиз, 23 май куни Беларусь ҳукумати Ryanair авиакомпаниясининг Афинадан Вильнюсга учаётган самолётини бортда бомба бор деган хабар билан шошилинч равишда Минскка қўнишга мажбур қилганди. Самолёт йўловчилари орасида Роман Протасевич ҳам бор эди. Протасевич ва унинг севгилиси — Россия фуқароси Софя Сапега аэропортда қўлга олинган. Беларусда «Nexta» собиқ бош муҳаррири тартибсизликлар уюштирганликда айбланган.
25 июнга қадар Протасевич ва Сапега қамоқда эди, аммо кейин улар тергов билан келишувга эришиб уй қамоғига ўтказилди. 8 декабрь куни Сапегага ижтимоий адоват ва нифоқ қўзғатиш, ахборот хавфсизлигига қарши жиноят, шахсий маълумотлар билан ишлаш қоидаларини бузиш ва ҳуқуқ-тартибот органлари ходимларига таҳдид қилиш моддалари бўйича якуний айблов қўйилди.
Аудиоёзув эълон қилинишидан олдин The New York Times манбаларига таяниб, берган хабарига кўра, самолётни Минскка фавқулодда қўндирган диспетчер буни Беларусь махсус хизмати томонидан уюштирилган операция деб айтган.
Кейинчалик Беларусь Тергов қўмитаси Минскка мажбурий қўндирилган Рйнаир самолётининг учувчиси ва диспетчер ўртасидаги суҳбат аудиоёзувини монтаж деб атаган.
Изоҳ (0)