Беларусда коронавируснинг янги «омикрон» штамми билан касалланиш бўйича илк ҳолатлар қайд этилди. Мазкур штамм тўрт кишида аниқланган, дея хабар берди «БелТА» Соғлиқни сақлаш вазирлиги маълумотларига таяниб.
Бу Беларусь Республикасида COVID-19 нинг янги варианти билан касалланиш бўйича илк тасдиқланган ҳолатлардир. Хабарда айтилишича, беморларнинг барчасида касаллик енгил кечмоқда.
Шунингдек, Беларусда бир суткада 1493 нафар кишида COVID-19 қайд этилган, 1699 нафар бемор шифохонадан чиқарилган.
Пандемия бошидан бери Беларусда коронавирусга топширган тести мусбат чиққан жами 696 220 киши рўйхатга олинган. 5543 киши касалликдан вафот этган, 688 890 бемор соғайган.
Аввалроқ Германияда «омикрон» штаммига чалинган одамлар орасида биринчи ўлим қайд этилганди. Бунга қадар Борис Жонсон Британияда «омикрон» штамми билан касалланган бемор вафот этганини маълум қилган. Шунингдек, АҚШ ва Австралияда ҳам «омикрон» билан боғлиқ биринчи ўлим кузатилган.
Коронавируснинг янги «омикрон» штамми биринчи марта 11 ноябрь куни Жанубий Африкада топилган. Жаҳон соғлиқни сақлаш ташкилоти мавжуд вакциналар ушбу штаммга қарши самарасиз бўлиши мумкин, деган шубҳалар туфайли «омикрон»ни хавфли деб тан олди. Ташкилот «омикрон» дунёнинг юздан ортиқ мамлакатида аниқлангани ҳақида хабар берган.
Изоҳ (0)