Қозоғистон президенти Қосим-Жўмарт Тўқаев «Қозоғистон Республикасининг айрим қонун ҳужжатларига ўлим жазосини бекор қилиш бўйича ўзгартириш ва қўшимчалар киритиш тўғрисида»ги қонунини имзолади, деб ёзади “Zakon.kz”.
Қонунга мувофиқ ўлим жазоси жазо тури сифатида Қозоғистон Жиноят кодексининг умумий қисмидаги 11 та моддадан, жумладан, жазо тизими, жазони тайинлаш ва алмаштириш тўғрисидаги моддалардан чиқариб ташланди. Бундан ташқари, ўлим жазоси тушунчаси, шартлари ва мораторий талабининг қўлланилишига оид махсус модда бекор қилинди, дейилади Оқўрда баёнотида.
Мамлакатда ўлим жазоси Жиноят кодексининг 17 моддаси санкциясидан чиқариб ташланган — энг оғир жазо умрбод қамоқ жазоси бўлиб қолмоқда. Жиноят кодексига киритилган ўзгартиришларга кўра, ўлим жазоси умрбод озодликдан маҳрум қилиш билан алмаштирилган шахсларни шартли равишда озод этиш тақиқланади.
13 октябрь куни Қозоғистон Мажлиси ўлим жазоси билан жазолаш бўйича Жиноят кодексига ўзгартириш ва қўшимчалар киритиш тўғрисидаги қонун лойиҳасини биринчи ўқишда маъқуллаган эди. Тузатишлар 13 та моддадан ўлим жазосини чиқариб ташлаш ва уни фақат ҳарбий характердаги ўта оғир жиноятлар учун қолдиришни таклиф қилади.
Аммо мамлакат президенти Қосим-Жўмарт Тўқаев парламентга ҳар қандай ҳолатда ҳам ўлим жазосини бекор қиладиган қонун тайёрлаш таклифи билан чиқди.
Декабрь бошида Қозоғистон парламенти ўлим жазосини бутунлай бекор қилиш ҳақидаги қонун лойиҳасини маъқуллади. 23 декабрь куни эса парламент Сенатининг ялпи мажлисида депутатлар «Қозоғистон Республикасининг айрим қонун ҳужжатларига ўлим жазосини бекор қилиш бўйича ўзгартиш ва қўшимчалар киритиш тўғрисида»ги қонунни қабул қилди.
Маълумот учун, Ўзбекистонда ўлим жазоси 2008 йил 1 январдан бошлаб бекор қилинган.
Изоҳ (0)