Ғарб оммавий ахборот воситалари КХДР етакчиси Ким Чен Иннинг янги ва эски суратларини солиштириб, унинг сўнгги пайтларда қанчалик озиб кетганидан ҳайратга тушди.
Британиянинг Daily Mail газетаси 28 декабрь куни Шимолий Корея марказий телеграф агентлиги томонидан эълон қилинган Ким Чен Иннинг суратини ўз веб-сайтига жойлаштирди. Сурат КХДР раҳбарининг Корея Меҳнат партияси марказий қўмитаси йиғилишидаги иштирокидан олинган.
Шимолий Корея раҳбари қанчалик вазн йўқотганини кўрсатиш учун газета унинг 2019 йил январь ва 2020 йил март ойларида олинган суратларини ҳам жойлаштирган.
«Бу суратларда КХДР етакчиси Ким Чен Ин сезиларли даражада тўлароқ кўринади», — дейди Daily Mail ўтган йиллардаги суратларга ишора қилиб.
Аввалроқ КХДР ОАВлари Ким Чен Иннинг вазн йўқотишини мамлакат фаровонлиги йўлидаги машаққатли меҳнатларининг оқибати билан изоҳлаганди. Жанубий Корея ОАВлари манбаларга таяниб, Шимолий Корея етакчиси соғлиғига жиддий эътибор қаратиб, атай вазн ташлагани ҳақида хабар берди. Октябрь ойида Yonhap агентлиги Жанубий Корея разведкасига таяниб, Ким Чен Ин 20 килограмм вазн йўқотгани, аммо соғлиғида ҳеч қандай муаммо йўқлигини хабар қилган.
Сентябрь бошида Ким Чен Иннинг интернетда чоп этилган фото ва видеотасвирлари кенг муҳокама қилинган. Кадрлар Кимнинг соғлиғи ҳақида янги миш-мишларга сабаб бўлган. Август бошида Ким Чен Иннинг бошидаги доғлар унинг соғлиғи ҳақида яна бир мунозарага сабаб бўлганди.
Мавзуга доир: Шимолий Корея Ким Чен Ин озиб кетганини тан олди
Изоҳ (0)