Путин хорижликларни давлатга хиёнат, тартибсизликлар уюштириш ва гиёҳванд моддалар савдоси учун Россия фуқаролигидан маҳрум қилиш таклифини билдирди

Россия президенти Владимир Путин Давлат Думасига Россия фуқаролиги тўғрисидаги федерал қонун лойиҳасини тақдим этди. Ҳужжатда, жумладан, фуқароликдан маҳрум қилишга сабаб бўладиган жиноятлар рўйхатини кенгайтириш назарда тутилади, деб ёзмоқда Meduza.

Қонун лойиҳасида фуқароликка қабул қилиш тўғрисидаги қарорларни бекор қилиш ўрнига фуқароликни тугатиш институтини жорий этиш таклиф қилинмоқда. Фуқароликни тугатиш учун сабаблар қаторига — фуқаронинг ихтиёрий истаги ҳамда жиноят содир этиш, унга тайёргарлик кўриш ёки жиноятга уриниш киради. Иккинчи ҳолатда, гап хорижликларга берилган фуқароликни бекор қилиш ҳақида кетмоқда.

Қонун лойиҳасига мувофиқ, чет элликларни Россия фуқаролигидан маҳрум қиладиган жиноятлар рўйхатини қуйидагилар билан кенгайтириш таклиф этилади:

• давлатга қарши оғир жиноятлар — шу жумладан, оммавий тартибсизликларни ташкил этиш (Россия Федерацияси Жиноят кодексининг 212-моддаси 1-қисми), давлатга хиёнат (Жиноят кодексининг 275-моддаси) ва жосуслик (Жиноят кодексининг 276-моддаси);
• гиёҳвандлик воситалари ва психотроп моддаларнинг муомаласи соҳасидаги жиноятлар, шу жумладан, гиёҳвандлик воситаларини кўп миқдорда ва ўта йирик ҳажмда қонунга хилоф равишда олиш ва сақлаш (Жиноят кодекси 228-моддаси 2—3-қисмлари), гиёҳвандлик воситаларини ишлаб чиқариш ёки сотиш (Жиноят кодексининг 228.1-моддаси 3—5-қисмлари).

Қонун лойиҳасида шунингдек, фуқароликни соддалаштирилган тарзда қабул қилиш тартибини 20 дан ортиқ тоифадаги шахслар билан кенгайтириш кўзда тутилган. Хусусан, гап ватандошлар — собиқ СССР фуқаролари ва уларнинг фарзандлари, шунингдек, яқин қариндошлари Россияда яшовчи ва Россия фуқаролигига эга бўлган одамлар ҳақида бормоқда. Инвесторлар ва малакали мутахассислар ушбу рўйхатга киритилмаган.

Россияликлар билан турмуш қурган чет элликлар, агар никоҳда умумий фарзанд бўлса,  фуқароликни соддалаштирилган тарзда олишга умид қилиши мумкин. Бу чора сохта никоҳларга қарши кураш билан изоҳланган.

Аввалроқ Путин полициячиларнинг ваколатини кенгайтирувчи қонунни имзолаган эди. Уларга фуқароларнинг автомобилларини тинтув қилишга рухсат берилган.