Гурбангули Бердимуҳамедов мунажжимлар башорати асосида 2022 йил учун тавсиялар берди

Туркманистон президенти Гурбангули Бердимуҳамедов 27 декабрь куни ҳукуматнинг 2021 йилдаги фаолияти якунларига бағишланган Вазирлар Маҳкамаси ва Хавфсизлик кенгашининг қўшма мажлисини ўтказди. Бу ҳақда «Хроника Туркменистана» хабар берди.

Йиғилиш якунида давлат раҳбари барча ҳукумат аъзоларини кириб келаётган Янги йил байрами билан табриклади. Туркманистон давлат ахборот агентлиги хабарига кўра, Бердимуҳамедов 2022 йилнинг рамзи йўлбарс бўлишини айтиб, унинг хусусиятлари ҳақида гапирган.

«Қоплон — ақлли, жисмонан ривожланган ва журъатли мавжудот бўлиб, худди шундай характерга эга бўлганларни ёқтиради», — деди Бердимуҳамедов ҳамда ҳайвоннинг турткилаш ва сусткашликни ёқтирмаслигини қўшимча қилди.

Ана шу хусусиятларни инобатга олган ҳолда Туркманистон раҳбари келгуси йил учун қуйидаги тавсияларни берди:

• йўлбарсга ўхшаш учун ўз-ўзини такомиллаштириш, янгиликларни англаш ва инновацияларда иштирок этиш билан фаол шуғулланиш зарур;
• 2022 йил тил ўрганиш ва мутахассисликларни ўзлаштириш учун қулай йил бўлади;
• йўлбарс йили соғлиқ учун жиддий муаммоларни келтириб чиқармайди, айниқса, фаол ҳаёт тарзи тарафдорлари учун яхши келади;
• йўлбарс руҳиятининг кучлилиги барча масалаларни ҳал қилишга ёрдам беради. Йўлбарс йилида туғилганлар яхши феъл-атвор, куч-қувват, хушмуомалалик билан ажралиб туради, бизнес ва ижодда муваффақиятларга эришади.

Шарқ астрологиясидан ташқари, Бердимуҳамедов нумерологияга ишонади, 7 рақамини омадли деб ҳисоблайди. Бу рақам кўпинча давлат раҳбари қатнашадиган пойгалардаги автомобиллар ва отларда қўлланилади. 2017 йилда Туркман оти кунини нишонлашда Бердимуҳамедовга еттита Ахалтек оти совға қилинган эди. Президент самолётларининг борт рақамларида ҳам ушбу рақам акс этган — EZ-777 (Boeing-777), EZ-007 (Boeing-737) ва EZ-700 (Boeing-737).