Belarusda koronavirusning yangi “omikron” shtammi bilan kasallanish bo‘yicha ilk holatlar qayd etildi. Mazkur shtamm to‘rt kishida aniqlangan, deya xabar berdi “BelTA” Sog‘liqni saqlash vazirligi ma’lumotlariga tayanib.
Bu Belarus Respublikasida COVID-19 ning yangi varianti bilan kasallanish bo‘yicha ilk tasdiqlangan holatlardir. Xabarda aytilishicha, bemorlarning barchasida kasallik yengil kechmoqda.
Shuningdek, Belarusda bir sutkada 1493 nafar kishida COVID-19 qayd etilgan, 1699 nafar bemor shifoxonadan chiqarilgan.
Pandemiya boshidan beri Belarusda koronavirusga topshirgan testi musbat chiqqan jami 696 220 kishi ro‘yxatga olingan. 5543 kishi kasallikdan vafot etgan, 688 890 bemor sog‘aygan.
Avvalroq Germaniyada “omikron” shtammiga chalingan odamlar orasida birinchi o‘lim qayd etilgandi. Bunga qadar Boris Jonson Britaniyada “omikron” shtammi bilan kasallangan bemor vafot etganini ma’lum qilgan. Shuningdek, AQSh va Avstraliyada ham “omikron” bilan bog‘liq birinchi o‘lim kuzatilgan.
Koronavirusning yangi “omikron” shtammi birinchi marta 11-noyabr kuni Janubiy Afrikada topilgan. Jahon sog‘liqni saqlash tashkiloti mavjud vaksinalar ushbu shtammga qarshi samarasiz bo‘lishi mumkin, degan shubhalar tufayli “omikron”ni xavfli deb tan oldi. Tashkilot “omikron” dunyoning yuzdan ortiq mamlakatida aniqlangani haqida xabar bergan.
Izoh (0)