Қозоғистон парламентининг қуйи палатаси Марказий сайлов комиссиясининг тақдимномасига биноан депутат Бекболат Тлеуханнинг ваколатлари муддатидан олдин тугатилди. Тлеухан ўз хоҳишига кўра ваколатини тугатишлари бўйича ариза ёзган, деб хабар беради «Интерфакс». Парламентдаги норасмий суҳбат давомида у журналистларга кўп хотинли никоҳда эканини айтган.
«Мен кўпхотинлиман, кўпхотинли никоҳдаман ва буни ҳеч қачон яширмаганман», — деган Тлеухан.
Журналистлар депутатдан ўзи аъзо бўлган «Нур Отан» партияси бунга қандай қарашини сўраганида у мулоқотни тўхтатиб, лифтга чиқишга қарор қилган. Қозоғистонда кўпхотинлик қонун билан тақиқланганини айтган журналистни эса Тлеухан лифтдан итариб чиқаришни бошлаган.
Бекболат Тлеухан 55 ёшда. У 2004 йилдан буён парламент қуйи палатасига III, IV, VI ва VII чақириқларда сайланган.
29 декабрь куни Қозоғистон Марказий сайлов комиссияси унинг депутатлик ваколатларини тугатиш бўйича қарор чиқарди. Кейинроқ у Бутунжаҳон этноспорт конфедерацияси биринчи вице-президентлигига ўтаётгани маълум бўлди.
Қозоғистонда кўпхотинлик 1998 йилда жиноий жавобгарликлар рўйхатидан чиқарилган.
Аввалроқ Қирғизистонда тўй видеосидан кейин кўпхотинлиликда гумонланган эркакка нисбатан жиноят иши тўхтатилгани, Москва муфтийси Россияда кўпхотинлиликни қонунийлаштиришни таклиф қилгани тўғрисида хабар берилганди.
Изоҳ (0)