Актриса ва модель Милла Йовович 2021 йил 17 декабрь куни 46 ёшни қарши олди.
Милла Йововичнинг биографияси
Славян миллатига мансуб америкалик актриса ота-онаси билан болалигида Совет Иттифоқидан АҚШга кўчиб борган. У жуда ёшлигидан танила бошлади ва «Бешинчи унсур», «Апокалипсис», «Ультрабинафша» ва «Resident Evil» фильмларида суратга тушгач, бутун дунё бўйлаб шуҳрат қозонди. Йовович актёрлик соҳасида, шунингдек, модель ва қўшиқчи сифатида ҳам ўзини кўрсата олди. У фаол ҳаёт тарзини олиб боради ва Голливуддаги энг талабгир актрисалардан бири.
Эрта болалик
Милла Йовович, ҳақиқий исми – Милица Богдановна Йовович 1975 йилда Совет Иттифоқида, Украинанинг пойтахти Киевда туғилган. Унинг отаси Богдан Йововичнинг келиб чиқиши серб бўлиб, СССР олий ўқув юртларида хорижий талабаларни ўқитиш дастури бўйича шифокор сифатида ўқиган бир пайтда онаси билан учрашган. Онаси Галина Логинова ВГИКни тугатиб, Довженко номидаги киностудияда ишлаган. Талабалик чоғида у Анатолий Ивановнинг Совет давридаги машҳур асари — «Тушда соялар сўнади» фильмининг телевизион версиясида рол ўйнаган. Милла Йовович болалигида оилавий ҳаёти яхши эмасди, чунки отаси рухсатнома ололмагани учун мамлакатни тарк этишга мажбур бўлган. Ўша даврда чет эл фуқароси билан турмуш қуриш кўплаб муаммоларга олиб келган. Милланинг онаси КГБ назорати остида бўлиб, уни ҳеч ким суратга тушишга таклиф қилмади. Яхши иш топа олмаган ва биргаликда яшамаган ота-она шундан сўнг кўчиб кетишга қарор қилган.
Биринчи синов
Милла 5 ёшга тўлганда унинг оиласи аввал Лондонга, кейин эса Америкага кўчиб кетди. Улар Лос-Анжелесга жойлашди, аммо муваффақиятга эришиш ҳақидаги ёрқин орзулари тезда барбод бўлди. Отаси шифокорлик гувоҳномасини ололмади, онаси эса талаффузи ва катта рақобат туфайли фильмларда рол ўйнай олмади. Богдан Йовович сохта тиббий суғурта қилгани учун узоқ муддатга қамалгач, вазият янада оғирлашди. Милланинг мактабда ўқиган йиллари ҳам яхши эмасди: синфдошлари уни қабул қилмади, кўпчилик СССРдан келган муҳожирларга душманлик кўзи билан қарар эди.
Улғайиш
Нотўкис оила ва мактабдаги ноқулай муҳитда бўлган Милла ўзини заиф, баъзан эса ёлғиз ҳис қиларди. Ёлғиз қолиб, орзуларига фақат меҳнат билан эришиш мумкинлигини англаган Милланинг онаси мусиқа, балет ва актёрлик сабоқларига қатнай бошлаган қизининг ўсишига бор вақтини ва пулини сарфлади. Галина қизи учун фотосессия ташкил қилишни бошлади. Бунинг учун улар суратларини олиш, сураткашлар билан учрашиш ва келишув учун турли шаҳарлар бўйлаб кўп вақтларини машинада ўтказишлари керак эди.
Машинада ўсмир қиз уй вазифасини бажариши, ухлаши ва макияжни амалга ошириши керак эди. Милла Йовович ва унинг онаси Галина тинмай қизи учун янги имкониятлар ва шартномаларни излади, шу билан бирга, она продюсер, ўқитувчи ва ижодий раҳбар ролини бажарди. У қизининг исмини ўзгартирди, исм инглиз тилида янада уйғунроқ бўлиши учун иккинчи «л» ҳарфини қўшди. Милла ўзининг ярим россиялик эканини таъкидлаб, журналистларга ўз онасидан ирода ва қатъиятни олганини, ва шу билан бирга, ўзини назорат қила олмаслиги характерининг энг ёмон қисми эканлигини айтиб ўтган.
Иш ва ўқиш билан машғул бўлиш, мураккаб характер ва ўсмирлик даври ёш Йововичнинг қийин вазиятларини ўз ичига олган. Пул топишни ва молиявий жиҳатдан мустақил бўлишни бошлаган Милла 16 ёшида уйни тарк этди, спиртли ичимликлар ва марихуанани қабул қила бошлади.
Фотомоделлик карьераси
Милланинг биринчи сурати Италиянинг Lei мода журналида пайдо бўлди. Муҳаррирлар унинг атиги 11 ёшда эканлигини билиб, дастлаб расмни чоп этишдан бош тортишди, аммо сураткаш Ричард Аведон уларга ультиматум қўйди. Милланинг гўзаллиги унга тез-тез суратга тушишига ёрдам берди. Бўлажак модель билан биринчи шартнома унинг 12 ёшида имзоланган ва у Revlon, Hugo Boss ва Calvin Klein’нинг реклама роликларида суратга тушишдан кунига 3 минг доллар ишлаб топишни бошлаган.
Йововичнинг суратлари Cosmopolitan, The Face, Vogue каби юздан ортиқ машҳур мода журналларида чоп этилган. Йиллар давомида у мода ва парфюмерия брендлари маҳсулотларини намойиш этди ва L’Oreal учун эксклюзив модель бўлишда давом этмоқда.
Актрисалик карьераси
Мода оламидаги муваффақиятлар ортидан Йовович «Катмандуга тунги поезд» (1988) фильмида дебют қилди ва фильмнинг давоми бўлган «Ҳаворанг лагунага қайтиш»дан сўнг машҳурликка эришди. Ричард Линклейтер Милланинг «Ҳузур ва саросимада» (Dazed and confused) (1993) фильмидаги иштироки билан боғлиқ деярли барча саҳналарни кесиб ташлагач, у фильмларда ишлашдан танаффус олишга қарор қилди ва Люк Бессоннинг «Бешинчи унсур» янги фантастик блокбастерида суратга тушиш таклифидан сўнг қайтиб келди.
«Бешинчи унсур» фильмидаги ўзга сайёралик Лилу роли Йововичнинг карьерасида алоҳида ўрин эгаллади ва уни Голливуд юлдузларининг энг юқори тоифасига кўтарди. Икки йил ўтгач, у ўша пайтдаги турмуш ўртоғи Бессоннинг жанговар фильмидаги жангчи Жоан д’Арк образининг янги талқинини тақдим этди. Берлин кинофестивалининг ҳакамлар ҳайъати томонидан тақдирланган Вим Вендерснинг «Миллион долларлик меҳмонхона» (2000) фильмида Милла Мел Гибсон билан биргаликда рол ижро этди. Кейинчалик у Бен Стиллер, Адриан Бродй, Роберт Де Ниро ва Эдвард Нортон каби актёрлар билан турли фильмларда суратга тушди. Милла Йовович Пол У. Андерсон – унинг ҳозирги турмуш ўртоғининг «Resident Evil» ва унинг бешта давомий фильмида суратга тушиш орқали ўзининг навбатдаги омадли чиптасини қўлга киритди. Жангчи ва жасур қиз Йововичнинг актёрлик карьерасидаги асосий образлардан бирига айланди.
Милла Йововичнинг шахсий ҳаёти
Йовович 16 ёшида ўзининг «Ҳузур ва саросимада» (Dazed and confused) фильмидаги ҳамкасби 21 ёшли Шон Эндрюсни севиб қолди ва бир неча кундан сўнг онасининг розилигисиз унга турмушга чиқди. Онанинг саъй-ҳаракатлари ва Милланинг ўзини англаши туфайли уларнинг никоҳи тезда бекор қилинди.
У 1997 йилда машҳур француз режиссёри Люк Бессон билан турмуш қурди, аммо 1999 йилда эр-хотин ажрашиш учун ариза берди.
Сўнгра Милла режиссёр Пол Андерсон билан оила қурди. 2002 йилда «Resident Evil» фильмини суратга олиш майдончасида танишиб, 7 йилдан кейин турмуш қурди. Икки фарзанддан кейин 2020 йил февраль ойида Милла учинчи марта она бўлди.
https://www.instagram.com/p/B8HZxNKneEq/?utm_source=ig_web_copy_link
У учинчи қизининг исмини Ошин Ларк Эллиот Йовович-Андерсон деб қўйди, Ошин уэлсликлар орасида эркакларнинг исмидир. Милла барча бўш вақтини оиласи билан ўтказади, болаларни тарбиялашни ота-оналарнинг асосий вазифаси деб билади, кўп ўқийди ва спорт билан шуғулланади. Шунингдек, актриса болаларига рус тилини ўргатиш билан бирга, рус маданияти билан ҳам таништиради. Милла Йовович 2020 йил бошидаги ёқимли муаммоларнинг янги тўлқини туфайли янги куч билан ишга қайтиш учун қисқа таътил олди.
Изоҳ (0)