Кўпчилик модель бўлиш учун журнал муқовасига суратга тушиб, подиумларда энг сўнгги бренд либосларни намойиш қилиш кифоя деб ўйлайди. Лекин ҳар соҳада бўлгани сингари мода оламида ҳам ўзига яраша қийинчиликлар бўлиши, соатлаб камера қаршисида туриш ва мукаммал кўриниш ортида саломатлик ва руҳият билан боғлиқ муаммолар келиб чиқиши мумкин. Marie Claire нашри ушбу қийинчиликларга қарамай, мода оламини забт этган ва энг кўп ҳақ тўланадиган моделлар ҳақида маълумот бериб ўтади.
Victoria’s Secret моделлар
Машҳур моделларнинг деярли барчаси Victoria’s Secret билан ҳамкорлик қилади, улардан айримлари эса бренднинг фаришталари (angels) яъни юзи бўлишнинг уддасидан чиқиб, компания билан бошқаларникидан фарқлироқ шартнома имзолайди. Маълумотларга кўра, 2016 йили Forbes’нинг энг кўп ҳақ тўланадиган моделлари рўйхатидан ўрин олган қизларнинг 17 тадан 11 таси Victoria’s Secret’нинг собиқ ёки ҳозирги «фаришталари» ҳисобланади. Бренднинг ўзи ҳам, брендга ишлайдиган моделлар ҳам шартнома шартларини маълум қилмаса-да, инсайдерлар бренднинг юзи бўлиш осон эмаслигини бир неча марта такрорлаган. 2016 йил февралда 36 нафар модель танлаб олиниб, 2017 йилнинг охирида улардан атиги 14 нафари Victoria’s Secret’нинг «фаришталари» бўлишга эришгани бунинг исботи.
Дауцен Крез
Карьерасидаги бир йиллик танаффусдан кейин моделлик бизнесига қайтган Крез Forbes версиясига кўра 2018 йилнинг энг кўп ҳақ тўланадиган юлдузларининг ўнталик рўйхатидан ўрин олган. Модель асосий даромади L’Oréal, Piaget ва Repeat Cashmere брендлари билан қилган ҳамкорлигидан. Ўша йили у моделлик фаолиятининг 15 йиллигини нишонлаган. Унинг карьерасидаги муваффақиятига 2014 йил Victoria’s Secret’ни тарк этгани ҳам таъсир кўрсатмаган.
Белла Ҳадид
8,5 миллион даромади сабаб Белла Forbes’нинг 2018 йилдаги энг кўп ҳақ тўланадиган моделлар рейтингида саккизинчи бўлган. 22 яшар Ҳадид бундай даромадга энг ёш модель ҳисобланади. Ёш эканига қарамай, Белла ўз касбига жиддий ёндашади ва уни ривожлантиришга керагидан ортиқ эътибор беради. Кунлик графиги иш ва фотосессиялар билан тўла бўлган модель 6 миллион доллар ишлаб, илк бор Forbes’нинг энг кўп даромадга эга моделлари рўйхатидан ўрин олган.
Жижи Ҳадид
Белланинг опаси 2018 йилда 9,5 миллион доллар ишлаб топган. У асосий даромадини Maybelline, Tommy Hilfiger, Reebok сингари брендлар билан қилган ҳамкорлигидан олган. Синглиси билан бир соҳада фаолият юритишига қарамай, у ўзини Белла билан таққосламайди. Elle нашрига берган интервьюсида у: «Белла билан услубимиз тамоман фарқли. У хоҳлайдиган иш мен излайдиган иш эмас, шу сабаб ҳам мен ҳеч қачон муваффақиятимизни солиштирмайман. У кўп нарсага мени илҳомлантиради, бир-биримиздан ўрганадиганларимиз бисёр», — деган у.
Жизел Бюндхен
90 йиллардан бошлаб Victoria’s Secret билан ҳамкорлик қилишни бошлаган Жизел 2007 йилга келиб брендни тарк этган. Бунга подиумларда Victoria’s Secret номидан очиқ-сочиқ чиқиши жонга теггани сабаб бўлган. Бренд билан ҳамкорлигига якун ясаганига қарамай, Бюндхен дунёдаги энг кўп ҳақ тўланадиган моделлардан бири бўлиб қолди. 2018 йилда 10 миллион доллардан кўп даромадга эга бўлган Бюндхен Forbes рейтингида бешинчи ўринни эгаллаган.
Кара Делевин
Кара Делевин псориаздан азият чеккани сабаб 2015 йилда мода оламини тарк этишга қарор қилган. Бунга мода ҳафталиклари давомида соатлаб суратга олиш жараёнидаги стресслар тери аҳволининг янада ёмонлашишига таъсир қилгани сабаб бўлган. Терисидаги муаммоларни яшириш учун эса визажистлар қалин консилерлардан кўпроқ фойдаланишга мажбур бўлган. «Қўлқоп кийиб олган одамлар мендаги муаммони мохов ёки шунга ўхшаш бирор нима деб ўйлаб, менга тегинишни истамаган», — деган у The Times’га берган интервьюсида. Аммо шунга қарамай, у 2018 йилда мода оламига қайтган ва фаолияти давомида 10 миллион даромадга эга бўлган.
Рози Хангтинтон-Уайтли
Молиявий аҳволи 11,5 долларга баҳоланиб, энг кўп ҳақ тўланадиган моделлар рейтингида учинчи бўлган Розига 2018 йил омадли келган. Айнан шу йили у она бўлиш бахтига муяссар бўлган.
Крисси Тейген
Моделлик бизнеси билан 2006 йилдан шуғулланишни бошлаган Тейген Forbes’нинг 2018 йилдаги рейтингида Рози билан бирга учинчи ўринни бўлишган. Илк бор Deal or No Deal шоусида чиқиш қилган модель кейинроқ Махим журналининг муқоваси учун суратга тушган. 2010 йилда эса Sports Illustrated томонидан «Йил кашфиёти» деб топилган.
Карли Клосс
2018 йилда 13 миллион доллар ишлаб топган Карли энг кўп ҳақ тўланадиган моделлар орасида иккинчи ўринга лойиқ деб топилган. Мода оламидаги фаолиятини бундан 10 йилдан кўпроқ вақт аввал бошлагани сабаб унга машҳурлик ҳам, бундай бадавлатлик ҳам янгилик эмас. 2015 йилда у подиумдаги ҳар бир чиқиши учун 249 долларга яқин маблағ олган.
Кендалл Женнер
Estee Lauder, Adidas, Calvin Klein брендлари билан қилган ҳамкорлиги сабаб Кардашьянлар оиласининг вакили 23 ёшида бир йил ичида 22,5 миллион доллар ишлаб топган. Энг кўп ҳақ тўланадиган моделнинг молиявий аҳволи бу қадар бўлишига нафақат брендлар билан қилган ҳамкорлиги, балки Keeping Up With the Kardashian’s шоусида иштироки сабаб бўлган. Айнан шу шоу сабаб бошқа моделлар сингари ҳаммасини нолдан бошламаганини Кендаллнинг ўзи ҳам тан олади.
Изоҳ (0)