Xitoyning shimolidan bo‘ron olib kelgan qum zarralari bilan ifloslanish oqibatida Pekin shahrining osmoni sariq tusga kirdi. Bu haqda Reuters xabar berdi.
Foto: Reuters
“Xitoyning shimolidan shamol olib kelgan qum zarralari va changdan iborat ulkan bulutlar natijasida Pekin osmoni sariq tusga kirdi, havoning ifloslanish darajasi keskin oshdi”, — deyiladi xabarda.
Mahalliy hukumatning ma’lumot berishicha, 14-aprel soat 16:00 holatiga ko‘ra, asosan qum va changning katta zarralari tufayli Pekinning havo sifati indeksi 324 gacha ko‘tarildi. Kechqurun shaharning ba’zi qismlarida bu ko‘rsatkich 1300 dan oshdi.
Foto: Reuters
Xitoy meteorologiya boshqarmasining xabariga ko‘ra, qum zarralari Mo‘g‘uliston va Xitoyning Ichki Mo‘g‘uliston mintaqasidan kelgan. Juma kunigacha kuchli shamol oqibatida Markaziy va Sharqiy Xitoyda havoning ifloslanish darajasi ortishi kutilmoqda.
Ta’kidlanishicha, havodagi qum miqdori o‘tgan oyda Xitoyning shimolida sodir bo‘lgan ikkita qum bo‘roniga qaraganda kamroq, lekin shamol tezligi yuqoriroq bo‘ldi.
Foto: Reuters
Xitoy odatdagidek har yilgi qum bo‘ronlariga Mo‘g‘ulistonning Gobi sahrosi sababchi ekanini ta’kidlamoqda.
Xitoyning Gansu mintaqasi delegatlarining mart oyida parlamentga bergan bayonotida ta’kidlanishicha, har yili mamlakatga bo‘ladigan qum bo‘ronlarining yarmidan ko‘pi chet eldan, asosan, Mo‘g‘ulistonning janubidan keladi.
See the sandstorm coming in Beijing today pic.twitter.com/ihng5lSkuE
— Zhou Lei (@ZhouLeiArt) April 15, 2021
Qum bo‘ronlarini to‘sish uchun Pekin hukumati “Buyuk yashil devor” loyihasi doirasida mamlakat chegaralari bo‘ylab millionlab daraxtlar ekmoqda.
