Украина президенти Владимир Зеленский 31 август куни президент Жо Байденнинг таклифи билан АҚШга учиб келди, деб ёзади «РБК».
Дастлаб у Вашингтонда энергетика вазири Женнифер Гренхольм ва мудофаа вазири Ллойд Остин билан учрашди. 1 сентябрь куни эса Байден билан учрашув ўтказди. У икки соатдан ортиқ давом этди, аслида эса президентлар учрашувига, тахминан, 45 дақиқа ажратилган эди.
Байден АҚШ «Россия тажовузи қаршисида» Украина суверенитетини қўллаб-қувватлашнинг «қатъий тарафдори» эканини маълум қилди. Шунингдек, Америка президенти келажакда яна Украинага ташриф буюришига умид билдирди.
Украина президенти америкалик ҳамкасби билан учрашувни изоҳлар экан, у нормал ҳолатда ўтганини, аммо вазият доим ҳам қуёшли бўлмаганини айтди. «Умуман олганда, учрашув нормал, маҳсулдор ўтди, аммо доим ҳам қуёшли муҳит бўлмади. Мўътадил эркакча суҳбат бўлди», — деди у.
Украина президенти Байден билан мулоқот чоғида салбий муносабатни сезмаганини қўшимча қилди. «АҚШ томонидан Украинага, менга, менинг жамоамга нисбатан салбий муносабат умуман бўлгани йўқ, бирорта ҳам жиҳатдан…», — деди Зеленский.
Шунингдек, Зеленский Байденга Донбассдаги вазиятни тартибга солиш жараёнида АҚШ иштирокининг бир нечта вариантларини таклиф қилган. Унинг сўзларига кўра, Байден ушбу таклифлар ҳақида ўйлаб кўришга ваъда берган.
Учрашув якунларига кўра, Киев ва Вашингтон стратегик шериклик тўғрисида қўшма баёнот қабул қилди, унда «Шимолий оқим-2» газ қувуридан «геосиёсий қурол» сифатида фойдаланилишига йўл қўймасликка ваъда беришди.
Киев ва Вашингтон «Шимолий оқим-2» газ қувури ишга туширилишига қарши чиқади ва уни Европа энергетика хавфсизлигига таҳдид деб ҳисоблайди. Шунингдек, баёнотда айтилишича, Вашингтон Украинанинг «транзит роли»ни сақлаб қолиш ва «ушбу ўтиш энергетик даврида етказиб беришлар хавфсизлигини» таъминлаш ниятида.
Бундан ташқари, томонлар келишиб олган бандлар қуйидагича:
- АҚШ Россиянинг Қрим устидан суверенитетини ҳеч қачон тан олмайди ва Украинанинг ўз келажагини ўзи белгилаш ҳуқуқини, шу жумладан, НАТОга аъзолик борасида, қўллаб-қувватлайди.
- АҚШ Украинага 60 миллион доллар миқдорида ҳарбий кўмак ажратади, пакет Javelin танкка қарши ракета мажмуаларини ўз ичига олади.
- Киев 2021 йилда ислоҳотлар ва демократик ўзгаришлар учун Вашингтондан 463 миллион доллар олади.
- АҚШ ва Украина савдо бўйича ўзаро ҳамжиҳатлик ҳақида меморандум тайёрлади, унинг мақсади — Америка компанияларининг Украина иқтисодиётида қатнашишига ва аксинча ҳолат учун имконият яратиш.
- Вашингтон Украинага коронавирусга қарши кураш учун қўшимча ёрдам, шу жумладан, молиявий кўмак ажратади.
Изоҳ (0)