Туркия ҳукумати 2023 йилгача Анқарада Ay Yıldız («Ярим ой ва юлдуз») номи остидаги мамлакат миллий Мудофаа вазирлиги лойиҳасини қуриб битирмоқчи. Комплекснинг икки марказий биноси мусулмон маданиятидаги икки рамз, мамлакат байроғида акс этган ярим ой ҳамда юлдуз шаклида барпо этилади. Бу ҳақда Meduza хабар қилган.
30 августда Туркия президент Ражаб Тоййиб Эрдўғон Анқарада мазкур мажмуанинг қурилишига старт бериш маросимида иштирок этди. У лойиҳани «Туркия душманларини қўрқинчга солувчи, мамлакат дўстларига ишонч бағишлайдиган тузилма» деб атаган. Эрдўғоннинг сўзларига кўра, бу ерда мудофаа соҳасининг марказлашган ягона тизими яратилади. Комплексда Мудофаа вазирлиги, марказий штаб ва барча турдаги Қуролли Кучларнинг қўмондонликлари жойлашади.
«Мудофаанинг ўзгариб бораётган эҳтиёжлари армиянинг барча бўлинмаларини ва вазирликларни бир том остида бирлаштиришни талаб этди», — деган Эрдўғон.
«Ярим ой ва юлдуз» ҳудуди 12,6 миллион квадрат метр майдонни эгаллайди, шундан 890 минг квадрат метрни ёпиқ бино ҳамда иншоотлар эгаллайди. Бу ерда 15 минг нафаргача одам ишлаши мумкин. Юлдуз шаклидаги бино мажмуага кириш йўли, ярим ой биносида эса конференц-заллар бўлади, тадбирлар учун майдон ҳам ушбу бино олдига жойлашади. Айни вақтда бўлажак мажмуа жойлашадиган ерда дастлабки қурилиш ишлари бошланган.
Ҳарбийлар бинолар комплексини АҚШ Мудофаа вазирлигининг штаб-квартираси, бешбурчак шаклидаги Пентагон билан таққосламоқда ва ҳатто «Турк Пентагони» бўлишини айтмоқда. Бироқ «Ярим ой ва юлдуз» лойиҳасининг майдони 604 минг квадрат метрни эгаллаган, шундан 343 минг квадрат метрини офис бинолари ташкил қиладиган Пентагонникидан катта, аммо АҚШ Мудофаа вазирлиги бинолар мажмуасига 23 минг нафар ходим жойлаштирилиши мумкин.
Туркия ОАВ «Ярим ой ва юлдуз» лойиҳасининг қачон очилиши ҳақида турли маълумотларни тарқатган. Anadolu агентлиги «Ярим ой ва юлдуз» лойиҳасидаги кампуснинг очилиш маросими 2023 йилнинг 19 майида ўтказилишини хабар қилган. Daily Sabah нашри эса шу куни қурилиш тўлиқ якунига етиши ҳақида ёзган. Hürriyet Daily News эса Эрдўғоннинг мазкур лойиҳани 2023 йил 29 октябрда Туркия Республикаси ташкил қилинганига 100 йил тўлиши муносабати билан очиш асосий вазифалардан бири эканини таъкидлагани ҳақида президентнинг сўзларидан иқтибос келтирган.
Изоҳ (0)