Афғонистоннинг «Толибон»га бўйсунмаган Панжшер вилоятидаги қаршилик кучлари билан тўқнашувларда ҳаракатнинг 300 дан ортиқ жангариси йўқ қилинди. Бу ҳақда 1 сентябрь куни «ТАСС»нинг вилоятдаги халқ лашкарига яқин манбаси хабар берди.
«Кеча кечқурун ‘Толибонънинг икки томондан Панжшерга бостириб киришга уринишларидан кейин юз берган тўқнашувларда уларнинг 300 дан ортиқ жангариси ўлдирилди. Яна ўнлаб радикаллар оғир тан жароҳати олди ёки асирга олинди », — деди манба.
«Айни пайтда вилоятга кираверишда ҳарбий ҳаракатлар давом этмоқда. ‘Толибон’ мудофаа чизиғини ёриб ўтолмади, ҳозир улар чекинишга мажбур», — дея қўшимча қилди манба.
Ҳаракат вакиллари томонидан Панжшер губернатори этиб тайинланган «Толибон» етакчилик комиссияси раҳбари Амир Хон Моттакийнинг 1 сентябрь куни маълум қилишича, «Толибон» ва қаршилик вакиллари ўртасида ўтган ҳафта бошланган музокаралар муваффақиятсизликка учраган.
Панжшердаги афғонларга мурожаат қилиб ёзилган нутқида «Толибон» етакчиси исёнчиларни қуролларини ташлашга, уларнинг раҳбари Аҳмад Масъудни эса таслим бўлишга чақирди.
«Афғонистон Ислом Амирлиги барча афғонларнинг уйидир», — деди у.
Моттакийнинг айтишича, «Толибон» Панжшер водийсининг тўрт томонида машғулот ўтказмоқда ва уруш қилишга ҳеч қандай сабаб йўқ. Унинг қўшимча қилишича, «Толибон»га қарши кучлар шуни эсда тутиши керакки, «Толибон»ни НАТО ва АҚШ кучлари кўмагида ҳам мағлуб этишнинг иложи йўқ.
«Лекин биз ҳали ҳам уруш бўлмаслигини ҳамда Панжшер масаласи тинч ва осойишта ҳал қилинишини таъминлашга ҳаракат қиляпмиз», — деди Моттакий.
Аввалроқ «Толибон» Панжшердаги қаршилик кучларига ҳужум қилгани, вилоятни интернетдан узиб қўйгани ҳақида хабар берилганди.
Изоҳ (0)