Буюк Британия бош вазири Борис Жонсон COBRА ҳукумат қўмитасининг Афғонистондаги вазият муҳокамасига бағишланган мажлисида бирлашган қиролликнинг «Толибон» ҳаракати вакиллари билан қандай шароитларда ишлашга тайёр эканлиги ҳақида тўхталиб ўтди, деб ёзмоқда «РИА Новости».
«Бизнинг сиёсий ва дипломатик саъй-ҳаракатларимиз Афғонистон муаммосини ҳал этиш йўлларини излаш, жумладан, бу борада зарурат туғилса, толиблар билан ишлашга қаратилган», – деган Жонсон Sky News телеканали эфирида.
Унинг сўзларига кўра, хориж фуқаролари ва афғонистонликларни эвакуация қилиш ишлари давом этаётган Кобул аэропортидаги вазият бироз барқарорлашган, 19–20 август кунлари Британияга 2 мингга яқин одам эвакуация қилинган. Шунингдек, Жонсон Буюк Британиянинг одамларни кўчириш схемаси бўйича 20 минг нафар афғонистонликни қабул қила олиши мумкинлигини эслатиб ўтган.
«Ҳукуматдаги ҳамма ҳар куни деярли 24 соат давомида ишлаяпти ва бор кучимизни сафарбар этиб, вазиятни ўзгартиришга уриняпмиз», – дея қайд этган бош вазир.
Айни вақтда 900 нафар британиялик ҳарбийлар Афғонистонда бўлиб турибди ва улар 3 мингга яқин Британия фуқаролари, икки давлат фуқаролигига эга шахслар, шу билан бирга, яна тахминан шунча Афғонистон фуқароларини эвакуация қилишга ёрдамлашмоқда. Эвакуацияни истаётган афғонистонликларнинг аксарияти «Толибон» ҳокимиятни эгаллагунига қадар британиялик ҳарбийларга кўмаклашган ва улар билан бирга ишлаган. Британия қуролли кучлари Афғонистонга ёрдам ва одамларни хавфсиз жойга кўчириш дастури (Аfghan Relocations and Assistance Policy, ARAP) доирасида ҳам иш олиб бориши мумкин.
Буюк Британия ички ишлар вазири Прити Пател бирлашган қироллик ҳарбийларининг Афғонистондан кунига мингга яқин одамни эвакуация қилаётгани ҳақида маълумот берган.
Буюк Британия узоқ келажакда «Толибон»дан паноҳ истаётган 20 минг нафар афғонистонлик қочқинларга бошпана беришни мақсад қилган. Британия ҳукумати дастур доирасида биринчи йилнинг ўзида 5 минг нафар қочоқни мамлакат ҳудудига кўчириб келмоқчи.
Афғонистондаги вазият охирги ҳафталарда «Толибон» ҳаракатининг мамлакатдаги чегара ҳудудларини тезкорлик билан эгаллаши, 15 августда эса Кобулга кириши ва президент саройини ўз назоратига олиши оқибатида кескинлашган. Афғонистон президенти Ашраф Ғани пойтахтда ва бутун мамлакатда қон тўкилишининг олдини олиш мақсадида Афғонистондан чиқиб кетган, орадан бир неча кун ўтгач унинг БААда эканлиги маълум бўлган. 16 августда «Толибон» сиёсий офиси вакили Муҳаммад Наим Афғонистонда уруш тугаганлиги, мамлакатнинг бошқарув шакли қандай бўлиши ҳақида яқин кунларда маълумот берилишини эълон қилган. Афғонистондан хорижлик дипломатлар, дипломатик миссиялар, чет эл ваколатхоналарида ишлаган ходимларни эвакуация қилиш ишлари фақат Кобул халқаро аэропорти орқали амалга оширилмоқда.Аввал БМТ бош котиби «Толибон» билан шахсан гаплашишга тайёрлигини айтгани, «Толибон» АҚШ устидан ғалаба қозонганини эълон қилгани, Туркия президенти Ражаб Тоййиб Эрдўғон «Толибон» билан ҳамкорлик қилишга тайёрлигини билдиргани, Европа Иттифоқи «Толибон»нинг Афғонистондаги ғалабасини тан олгани, ҲАМАС ҳаракати «Толибон»ни Афғонистондаги ғалаба билан табриклагани ҳақида хабарлар берилган.
Изоҳ (0)