Вашингтонда Конгресс кутубхонаси биноси олдига келиб тўхтаган юк машинаси ҳайдовчиси машинада бомба борлигини айтди. Бу ҳақда Associated Press хабар берди.
Полиция яқин атрофдаги бир қанча бинолардан одамларни эвакуация қилган ва эркак билан муроса қилишни бошлаган. Полиция унинг қўлида портлаткичга ўхшаш қурилма борлигини пайқаган.
CNBC хабар беришича, гумондор — Шимолий Каролинада яшовчи 49 ёшли Флойд Рей Роузберри. Эркак ўз машинасидан Facebook’да жонли эфир ўтказиб, АҚШ ҳукуматини танқид қилган ва портлашлар билан таҳдид қилган. Бир неча соат ўтгач, ижтимоий тармоқ маъмурияти видеони ўчириб ташлади.
Хабарга кўра, бу одам жонли эфирда АҚШ президенти Жо Байден билан гаплашишга рухсат беришни талаб қилган ва бошқа жойга яна тўртта бомба қўйганини айтган. Эркакнинг сўзларига кўра, агар хавфсизлик кучлари уни ўлдирса, улар икки яримта блокни портлатиб юбориши мумкин.
Бир неча соатлик музокаралардан сўнг эркак расмийларга таслим бўлди. Капитолий полицияси бошлиғи Том Менжер гумонланувчининг ўзи машинадан чиқиб, ҳуқуқ-тартибот органларига таслим бўлганини тасдиқлади.
Оқ уй вакилининг айтишича, президент Жо Байденга Вашингтондаги бомба хавфи ҳақида хабар берилган. Ҳукумат Конгресс кутубхонасининг иккита биносини, энг яқин офис биносини ва Олий судни эвакуация қилган.
Шунингдек, 19 август куни Нью-Йоркдаги Таймс-скверда номаълум шахс шубҳали нарса ташлаб кетгани туфайли полиция майдоннинг бир қисмидан одамларни эвакуация қилганди.
NBC ёзишича, велосипедда кетаётган киши зинапояда ўтирган одамлар ёнига металл қутига ўхшаган буюмни ташлаган, натижада одамлар қочиб кетган.
Нью-Йорк шаҳар полицияси, «полиция текшируви муносабати билан», еттинчи авеню бўйлаб 45-чи кўчадан 48-чи кўчага қадар Таймс-сквер кўчаларини ёпиб қўйган. Кейинчалик полиция бўлими майдондаги шубҳали нарса текширилгани, у ҳеч қандай хавф туғдирмаслигини маълум қилган. Полиция қуршови тарқатиб юборилган.
Изоҳ (0)