АҚШнинг Кобулдаги элчихонаси ходимлари Давлат департаментини Америка қўшинлари олиб чиқилгач, кўп ўтмай Афғонистонда ҳокимият қулаши мумкинлиги ҳақида огоҳлантирган. Бу ҳақда The Wall Street Journal ўз манбаларига таяниб хабар берди.
Уларга кўра, 13 июль куни Америка элчихонасининг 23 нафар ходими АҚШ давлат котиби Энтони Блинкенга ва Давлат департаменти Сиёсий режалаштириш бюроси раҳбари Салмон Аҳмадга телеграмма юбориб, «Толибон» ҳаракати жангариларининг тезкор ва муқаррар ҳужуми ҳақида огоҳлантирган.
The Wall Street Journal манбалари қайд этишича, Америка дипломатлари ўша вақтда Афғонистон ҳукумат кучлари радикалларга қаршилик кўрсата олмаслиги мумкин, деган фикрда бўлган.
Шу сабабли элчихона ходимлари АҚШ қўшинларини олиб кетиш якунланганидан кейин (якунлаш 31 августга белгиланган эди) тез орада Кобулдаги ҳокимият радикаллар қўлига ўтиши мумкинлиги юзасидан хавотир билдирган. Газета манбаларига кўра, Америка ташқи сиёсий идораси раҳбари бу ҳужжат билан танишиб чиққан.
Элчихона ходимлари Вашингтондаги ҳукуматга зудлик билан АҚШ Қуролли кучлари билан ҳамкорлик қилган афғонистонликлар орасидан махсус иммиграция визаларига эҳтимолий даъвогарлар ҳақида маълумот тўплаш ва уларни рўйхатга олишни бошлашни маслаҳат берган. Бундан ташқари, 1 августдан кечиктирмасдан, мамлакатдан эвакуация рейсларини ишга тушириш тавсия этилган эди.
Аввалроқ эса АҚШ президенти Жо Байден АБC телекомпаниясига берган интервьюсида Америка разведкаси ҳисоботларида «Толибон»нинг Афғонистонда қачон ҳокимият тепасига келиши борасида аниқ битта фикр бўлмаганини билдирганди. «Улар бу йил охирига яқин содир бўлиши эҳтимоли энг юқори эканини айтганди», — деди Байден.
Апрель ойида Байден Америка қўшинларининг барчасини Нью-Йорк ва Вашингтонда 2001 йил 11 сентябрда юз берган терактларга 20 йил тўладиган кунгача олиб чиқиб кетишни ваъда қилган эди. Кейинроқ муддат 31 августга сурилди. Июлга келиб Афғонистондан АҚШ ҳарбий контингентининг 90 фоизи чиқиб кетди. Шундан кейин «Толибон» ҳукумат ҳарбий кучларига қарши ҳужумларни кучайтирди. 15 август куни жангарилар Кобулдаги президент саройига кирди ва Афғонистонни тўлиқ эгаллаб олганини эълон қилди. Президент Ашраф Ғани мамлакатдан қочиб кетди.
Изоҳ (0)