Қирғизистон Давлат чегара хизмати томонидан хавфсизликни таъминлаш мақсадида давлат чегарасининг қирғиз-тожик ва қирғиз-ўзбек участкаларида қўшимча вақтинчалик чегара постлари ўрнатилди, шунингдек, режалаштирилган разведка-қидирув ишлари олиб борилмоқда. Бу ҳақда Қирғизистон Миллий хавфсизлик давлат қўмитаси Чегара хизмати матбуотига таяниб, Anadolu Agency хабар берди.
Матбуот хабарида айтилишича, Афғонистондан Қирғизистонга қочқинлар келаётгани ҳақида ижтимоий тармоқларда тарқалган маълумотлар ишончли эмас.
Қирғизистоннинг Афғонистон билан умумий чегараси йўқ.
«Шу билан бирга, чегара хизмати Афғонистонда содир бўлаётган воқеаларни ҳамда Тожикистон, Ўзбекистон ва Туркманистон билан чегарадаги вазиятни диққат билан кузатиб бормоқда. Қирғизистон Чегара хизмати қўшни давлатларнинг чегара вакиллари идоралари билан ўзаро манфаатли маълумот алмашиш бўйича ҳамкорликни фаоллаштирди. Қирғизистон давлат органлари ва ҳуқуқни муҳофаза қилиш органлари билан қўшма ҳаракатлар режаси ишлаб чиқилди ва давлат чегарасида вазият кескинлашган тақдирда ўзаро таъсир механизми ишлаб чиқилди», — дейилади хабарда.
Аввалорқ Қозоғистон президенти Қосим-Жўмарт Тўқаев давлат органлари вакиллари билан учрашувда Афғонистондаги вазиятга тезкор жавоб чораларини муҳокама қилганди. Президент тегишли идораларга Афғонистондаги вазиятнинг ривожланишини ҳар томонлама кузатишда давом этиш вазифасини юклаган.
Ўзбекистон Ташқи ишлар вазирлиги вакили 14 август куни 84 афғон ҳарбийлари Ўзбекистон билан чегарани кесиб ўтиб, ёрдам сўраганини маълум қилганди. Афғонистон билан чегарадош бўлган Сурхондарё вилоятининг Термиз туманидаги чодирли лагерга 100 дан ортиқ афғонистонлик қочқинлар жойлаштирилган. Спутник маълумотларига кўра, қочқинлар сони 150 га яқин, улардан 17 нафари аёллар ва болалар. Бу одамларнинг яшаш муддати ва кейинги тақдири ҳақида ҳозирча хабар берилмаган.
Изоҳ (0)