Қирғизистон ҳарбий вертолёти Тожикистон чегарасига яқин Олай тумани ҳудудига фавқулодда қўнди. Бу ҳақда Миллий хавфсизлик давлат қўмитасига асосланиб, «РБК» хабар берди.
Қайд этилишича, бортда 15 киши бўлган, тўрт киши жабрланган. Вертолёт аввалроқ вазият ёмонлашгани хабар қилинган Чон-Олай минтақасига қараб кетаётган эди.
Бундан аввал Қирғизистон Тожикистон билан чегарада вазият кескинлашганини хабар қилганди.
Хабарга кўра, чегаранинг Тожикистон томонида автомобиллар ва енгил зирҳли транспорт воситаларида ҳарбий хизматчиларнинг шахсий таркиби тўпланган. Тожикистон вакиллари тунда Ўш вилояти Чон-Олай тумани Унжу-Булоқ ҳудудидаги тавсифланмаган жойда контейнер ўрнатишни бошлаган ҳамда Қирғизистон ҳудудига минг метргача кириб келган.
Таъкидланишича, Қирғизистон вазиятни томонларнинг чегара вакиллари даражасида ҳал қилиш бўйича чораларни кўрмоқда. Бироқ Тожикистон чегара хизмати вакиллари телефон қўнғироқларига жавоб бермаяпти.
Эслатиб ўтамиз, апрель ойи охирида Қирғизистон ва Тожикистоннинг чегараолди вилоятлари аҳолиси ўртасидаги зиддият икки мамлакат ҳарбийларининг қуролли тўқнашувига айланиб кетганди. Қирғиз-тожик чегарасидаги низоларда Қирғизистоннинг 36 фуқароси ҳалок бўлди, 200 га яқин киши жароҳат олди. Тожикистон эса 19 киши ҳалок бўлгани, 87 киши жабрлангани ҳақида хабар берди. Можарода 300 дан ортиқ уйлар ва инфратузилма объектлари вайрон қилинган, айримлари ёниб кетган. 29 апрель оқшомида томонлар низони тўхтатиш ва чегарадан ҳарбий кучларни олиб кетиш тўғрисида келишиб олди, аммо эртаси куни яна отишма бошланди. 30 апрель куни тушдан кейин навбатдаги сулҳга эришилди. 3 май куни Қирғизистон ва Тожикистон ўз ҳарбий кучларини чегара чизиғидан олиб чиқишни якунлади.
Изоҳ (0)