Беларусь мамлакатдаги АҚШ элчихонасининг дипломатик ва маъмурий-техник ходимларини қисқартиради ҳамда виза бериш тартибини кучайтиради. Беларусь Ташқи ишлар вазирлиги Ryanair самолётининг фавқулодда Минскка қўниши ҳамда Беларусь мухолифати журналисти Роман Протасевичнинг ҳибсга олинишидан сўнг АҚШ томонидан киритилган санкцияларга жавобан шундай қарорга келди, деб ёзади Meduza.
Бундан ташқари, Ташқи ишлар вазирлиги америкалик мутахассисларнинг мамлакатда ишлашини вақтинча чеклашга, шунингдек, АҚШ Халқаро тараққиёт агентлиги(USAID)нинг Беларусда фаолият олиб бориши тўғрисидаги қарорини бекор қилади, дея хабар берди вазирлик веб-сайти.
«Ушбу чора-тадбирлар маълум бир нуқтага қаратилган, улар АҚШга Беларусь билан муносабатларда босим ва мажбурлаш бефойда экани тўғрисида очиқ сигнал юбориш учун мўлжалланган», — деди ташқи ишлар вазирлиги вакили Анатолий Глаз.
Унинг сўзларига кўра, Минск воқеаларнинг бундай тус олишини кутган, энди у Америка чекловлари Беларусь аҳолиси ва ташкилотларига таъсир қилмаслиги учун барча имкониятларни ишга солмоқда.
АҚШ Давлат департаменти маълум қилишича, Беларуснинг Америка дипломатик ваколатхонаси ходимларини қисқартириш тўғрисидаги қарори 13 июндан кучга киради.
Май ойи охирида АҚШ Беларусь билан ҳаво алоқалари тўғрисидаги шартномани тўхтатиб, Беларусь давлат корхоналарига қарши санкцияларни янгилаш тўғрисида маълум қилганди. Бунга 23 май куни Афинадан Вильнюсга йўл олган Ryanair самолётининг бортида бомба борлиги ҳақидаги хабар билан Минскка мажбурий қўндирилиши сабаб бўлган. Текширувлардан кейин самолёт бортидан ҳеч қандай хавфли нарса топилмаган.
Ушбу рейсда Беларусда террорчи деб эълон қилинган Nexta Telegram-каналининг собиқ бош муҳаррири Роман Протасевич ва унинг қаллиғи россиялик Софя Сапега бўлган. Улар рейсдан туширилиб, икки ой муддатга ҳибсга олинган.
Маълумот учун, АҚШ президенти Жо Байден ўз маъмуриятига Минскда Ryanair самолётининг фавқулодда қўниши ва Nexta Telegram-канали асосчиларидан бири ҳибсга олинишида иштирок этган одамларни жавобгарликка тортиш чораларини ишлаб чиқишни буюрди.
Ўз навбатида, Европа Кенгаши Ryanair самолётининг Беларусга мажбуран қўниши ҳамда мухолиф журналистининг ҳибсга олинишини қораламоқда.
Юзага келаётган кенг кўламли норозиликларга жавобан Беларусь президенти Александр Лукашенко Ryanair самолётининг фавқулодда Минскка қўниши ҳамда Роман Протасевич ҳибсга олиниши билан боғлиқ ҳодисада қонун доирасида ҳаракат қилганини таъкидлади.
Фуқаро авиацияси халқаро ташкилоти Ryanair самолётининг Минскка мажбурий қўниши юзасидан текширув ўтказишини маълум қилди. Ташкилотнинг оралиқ ҳисоботи 25 июнда тақдим этилиши кутилмоқда.
Изоҳ (0)