Қирғизистон ва Тожикистон чегарасида вазият кескинлигича қолмоқда. Бу ҳақда Қирғизистон Миллий хавфсизлик давлат қўмитаси чегара хизмати хабар қилди, деб ёзади «РБК».
«Чегаранинг Тожикистон томонида автомобиллар ва енгил зирҳли транспорт воситаларида ҳарбий хизматчиларнинг шахсий таркиби тўпланган. Миллий хавфсизлик давлат қўмитаси чегара хизмати зиддиятнинг авж олишига йўл қўймаслик учун барча чораларни кўрмоқда», — дейилади чегара хизмати хабарида.
Хабарга кўра, Тожикистон вакиллари тунда Ўш вилояти Чон-Олай тумани Унжу-Булоқ ҳудудидаги тавсифланмаган жойда контейнер ўрнатишни бошлаган ҳамда Қирғизистон ҳудудига минг метргача кириб келган.
Чегара хизмати таъкидлашича, Қирғизистон вазиятни томонларнинг чегара вакиллари даражасида ҳал қилиш бўйича чораларни кўрмоқда. Бироқ Тожикистон чегара хизмати вакиллари телефон қўнғироқларига жавоб бермаган.
Чегара муаммоси Қирғизистонда бир неча йилдан бери долзарб бўлиб келмоқда. Чегарадаги баҳсли ва тавсифланмаган ҳудудлар туфайли Қирғизистон ва бошқа давлатлар аҳолиси ўртасида тўқнашувлар бўлиб туради.
Сўнгги марта апрель ойи охирида Қирғизистон ва Тожикистоннинг чегараолди вилоятлари аҳолиси ўртасидаги зиддият икки мамлакат ҳарбийларининг қуролли тўқнашувига айланиб кетганди. Қирғиз-тожик чегарасидаги низоларда Қирғизистоннинг 36 фуқароси ҳалок бўлди, 200 га яқин киши жароҳат олди. Тожикистон эса 19 киши ҳалок бўлгани, 87 киши жабрлангани ҳақида хабар берди. Можарода 300 дан ортиқ уйлар ва инфратузилма объектлари вайрон қилинган, айримлари ёниб кетган. 29 апрель оқшомида томонлар низони тўхтатиш ва чегарадан ҳарбий кучларни олиб кетиш тўғрисида келишиб олди, аммо эртаси куни яна отишма бошланди. 30 апрель куни тушдан кейин навбатдаги сулҳга эришилди. 3 май куни Қирғизистон ва Тожикистон ўз ҳарбий кучларини чегара чизиғидан олиб чиқишни якунлади.
Изоҳ (0)