Qirg‘iziston harbiy vertolyoti Tojikiston chegarasiga yaqin Olay tumani hududiga favqulodda qo‘ndi. Bu haqda Milliy xavfsizlik davlat qo‘mitasiga asoslanib, “RBK” xabar berdi.
Qayd etilishicha, bortda 15 kishi bo‘lgan, to‘rt kishi jabrlangan. Vertolyot avvalroq vaziyat yomonlashgani xabar qilingan Chon-Olay mintaqasiga qarab ketayotgan edi.
Bundan avval Qirg‘iziston Tojikiston bilan chegarada vaziyat keskinlashganini xabar qilgandi.
Xabarga ko‘ra, chegaraning Tojikiston tomonida avtomobillar va yengil zirhli transport vositalarida harbiy xizmatchilarning shaxsiy tarkibi to‘plangan. Tojikiston vakillari tunda O‘sh viloyati Chon-Olay tumani Unju-Buloq hududidagi tavsiflanmagan joyda konteyner o‘rnatishni boshlagan hamda Qirg‘iziston hududiga ming metrgacha kirib kelgan.
Ta’kidlanishicha, Qirg‘iziston vaziyatni tomonlarning chegara vakillari darajasida hal qilish bo‘yicha choralarni ko‘rmoqda. Biroq Tojikiston chegara xizmati vakillari telefon qo‘ng‘iroqlariga javob bermayapti.
Eslatib o‘tamiz, aprel oyi oxirida Qirg‘iziston va Tojikistonning chegaraoldi viloyatlari aholisi o‘rtasidagi ziddiyat ikki mamlakat harbiylarining qurolli to‘qnashuviga aylanib ketgandi. Qirg‘iz-tojik chegarasidagi nizolarda Qirg‘izistonning 36 fuqarosi halok bo‘ldi, 200 ga yaqin kishi jarohat oldi. Tojikiston esa 19 kishi halok bo‘lgani, 87 kishi jabrlangani haqida xabar berdi. Mojaroda 300 dan ortiq uylar va infratuzilma obyektlari vayron qilingan, ayrimlari yonib ketgan. 29-aprel oqshomida tomonlar nizoni to‘xtatish va chegaradan harbiy kuchlarni olib ketish to‘g‘risida kelishib oldi, ammo ertasi kuni yana otishma boshlandi. 30-aprel kuni tushdan keyin navbatdagi sulhga erishildi. 3-may kuni Qirg‘iziston va Tojikiston o‘z harbiy kuchlarini chegara chizig‘idan olib chiqishni yakunladi.
Izoh (0)