Туркманистон президенти Гурбангули Бердимуҳамедов раислигида 2 май куни Давлат хавфсизлик кенгашининг йиғилиши бўлиб ўтди. Бу ҳақда Туркманистон давлат ахборот агентлигига таяниб «Хроника Туркменистана» хабар берди.
Мажлисда бош вазирнинг хавфсизлик масалалари бўйича ўринбосари Чоримурат Аманов ҳарбий ислоҳотни амалга ошириш, шунингдек, ҳарбий хизматчилар ва уларнинг оилаларини ижтимоий таъминлаш масалаларини ҳал қилиш тўғрисида ҳисобот берди.
Ҳисоботни эшитгандан сўнг президент Амановга «хизмат вазифаларини нотўғри бажаргани, бўйсунувчи муассасалар фаолияти устидан назоратни сусайтиргани учун камчиликларни иложи борича тезроқ тузатиш тўғрисида сўнгги огоҳлантириш билан» қаттиқ танбеҳ берди.
Ички ишлар вазири Мамметхон Чакиев қонун ва тартибни таъминлаш, вилоят ва пойтахт автомагистралларида транспорт оқимларини оптималлаштириш ҳақида ҳисобот берди. Давлат раҳбари йўл ҳаракати қоидалари ва ёнғин хавфсизлиги бўйича мунтазам равишда тушунтириш ишларини олиб боришни буюрди.
Сўнг президент «ишидаги жиддий камчиликлари учун» ички ишлар вазирининг ўринбосари, ички ишлар подполковниги Жумамурат Нураевни ўз лавозимидан озод қилди. Шунингдек, Бердимуҳамедов «хизмат вазифаларини лозим даражада бажармагани, назорат қилинадиган хизматлар устидан назоратни сусайтиргани учун» ички ишлар вазири Чакиевга камчиликларни имкон қадар тезроқ тузатиш тўғрисида сўнгги огоҳлантириш билан қаттиқ танбеҳ берди.
Олий назорат палатаси раиси Сердар Бердимуҳамедов мамлакат мустақиллигининг 30 йиллигида фойдаланишга топширилиши мўлжалланган объектларнинг қурилиш майдонларида ишларнинг ҳолатини назорат қилиш бўйича берилган кўрсатмаларнинг ижроси тўғрисида ҳисобот берди.
Президент мудофаа вазири Бегенч Гундогдиевга Туркманистон мустақиллигининг 30 йиллиги муносабати билан бўлажак ҳарбий текширувни керакли даражада ташкил этишни топширди.
Шунингдек, президент «инсон саломатлигига салбий таъсир кўрсатадиган» ҳарорат кўтарилиши мавзусига тўхталиб, ички ишлар идоралари раҳбарларига шахсий таркиб ўртасида тушунтириш ишларини олиб боришни топширди.
Аввалроқ Туркманистонда озиқ-овқат дўконларида навбатга туриш тақиқлангани, чунки бу президентнинг «имижига салбий таъсир қилиши» ҳақида хабар берилганди. Туркманистон савдо ишлари бўйича бош вазири ўринбосари Чори Гилижов 30 апрель куни бўлиб ўтган Вазирлар Маҳкамаси мажлисида президент Гурбангули Бердимуҳамедовга ички бозор маҳаллий маҳсулотлар билан тўлиқ таъминлангани тўғрисида ҳисобот берган.
Шунингдек, Туркманистон президенти иккинчи сунъий йўлдошни учиришни ва юк самолётларини сотиб олишни буюргани, саноат сектори ишини танқид қилиб, «Туркманхимия» раҳбарига қаттиқ танбеҳ бергани ҳамда олимларга картошка ҳосилдорлигини оширишни буюргани ҳақида хабар берилган.
Изоҳ (0)