Беларусь ҳукумати Telegram’даги 60 га яқин канал ва чатларни экстремистик деб тан олди

Айни вақтга қадар Беларусь судлари Telegram мессенжеридаги қарийб 60 та канал ва чатларни экстремистик деб топди. Бу ҳақда 3 июнь куни республика Ички ишлар вазирлигида хабар берилди, деб ёзмоқда «ТАСС».

«3 июнь ҳолатига кўра, суд қарори билан 34 та Telegram канали ва 24 та Telegram чати экстремистик деб топилди», — дейилади вазирлик баёнотида.

Ички ишлар вазирлиги ушбу ресурслардан ахборотларни репост қилиш ёки тарқатиш қонун билан жавобгарликка тортилишини эслатди. «Экстремистик материалларни сақлаш, шунингдек, экстремистик деб топилган Telegram каналлари ва чатларига обуна бўлиш маъмурий жавобгарликка сабаб бўлади», — дейилади Беларусь Ички ишлар вазирлиги хабарида.

3 июнь куни республика Бош прокуратураси яна бир Telegram каналини экстремистик деб тан олганини эълон қилди.

Вазирлик маълумотларига кўра, «Экстремизмга қарши курашиш тўғрисида»ги қонун асосида Жодино шаҳри (Минск вилояти) прокурори Telegram каналидаги «Жодино ҳаёт учун суҳбат» ( «Жодино для жизни чат») ахборот маҳсулотларини экстремистик материаллар деб тан олиш тўғрисида баёнот тайёрлади ва судга юборди.

Жодино суди прокурорнинг баёнотини тўлиқ қондирди ва қарорнинг зудлик билан бажарилишига имкон берди», — дея таъкидлади прокуратура. Суд қарорининг бир нусхаси экстремистик материалларнинг республика рўйхатига киритилганини билдириш ва Беларусь ҳудудида экстремистик материалларнинг тарқалишига ҳисса қўшган интернет-ресурсларни блоклаш учун Ахборот вазирлигига юборилди.

Беларусда 2020 йилнинг 9 августида бўлиб ўтган президент сайловларидан сўнг бир неча ой давомида сайлов натижаларига нисбатан норозилик акциялари бўлиб ўтган эди. Энг оммавий норозилик намойишлари овоз бериш натижалари эълон қилингандан сўнг уюштирилган ва дастлабки кунларда улар хавфсизлик кучлари билан тўқнашувларга олиб келган. Расмийлар фикрига кўра, кўплаб ҳаракатлар Telegram каналлари, шунингдек, мессенжерлар ва ижтимоий тармоқлардаги гуруҳлар орқали мувофиқлаштирилган.

Беларусда экстремистик деб топилган биринчи Telegram канали Nexta бўлди. Республика Олий судининг 2020 йил 20 октябрдаги қарори билан телеканал ва унинг логотипи республикада экстремистик деб топилди. Унинг асосчиси Степан Путило ва собиқ бош муҳаррири Роман Протасевичга тартибсизликлар ва ҳукумат амалдорларининг қонуний талабларига бўйсунмаслик, шунингдек, ижтимоий адоват ва ихтилофни қўзғаш билан боғлиқ оммавий ҳаракатларни уюштириш бўйича айбловлар қўйилди.

Эслатиб ўтамиз, май охирида Минскда Nexta мухолифатчи Telegram канали собиқ муҳаррири Роман Протасевич қўлга олинди. У учаётган самолёт бомба ҳақидаги хабар туфайли Беларусга фавқулодда қўндирилди. Қўниш ҳақидаги қарорни Лукашенконинг шахсан ўзи «Европани ҳимоя қилиш» учун қабул қилган.