Бухоро вилояти Когон туманида одам ўлими билан якунланган йўл-транспорт ҳодисаси содир бўлди, дея хабар бермоқда ЙҲХББ.
Қайд этилишича, 2021 йил 21 май куни соат 22:30 ларда Nexia ҳайдовчиси Когон тумани ҳудудидан ўтувчи 4Р-63 сонли автомобиль йўлининг 10-километрида ҳаракатланиб келаётган пайтида ўзидан олдинда ҳаракатланиб бораётган машинани қувиб ўтиш мақсадида қарама қарши йўналишга ўтиб ҳаракатланади.
Оқибатда қаршисидан чиққан HOWO русумли юк машинасининг олд қисмига бориб урилади. Nexia ҳайдовчиси кучли жароҳат олиб, шифохонага ётқизилади.
Бироқ кўрсатилган тиббий ёрдамга қарамасдан, ҳайдовчи вафот этди.
ЙТҲ содир бўлган ҳудудда тезликни онлайн назорат қилувчи 3 та кўчма радар ўрнатилди. Йўл белгилари ва чизиқлари тўлиқ соз ҳолатга келтирилди.
Бундан аввал Наманганда Nexia пастликка қулаши оқибатида бир киши ҳалок бўлгани, Сурхондарёда Damas ва «КамАЗ» тўқнашувида икки киши ҳалок бўлгани ҳамда Фарғонада бошқарувни йўқотган Nexia симёғочга урилиши оқибатида 15 ёшли бола вафот этгани ҳақида хабар берилганди.
Изоҳ (0)