Buxoroda o‘zidan oldingi mashinani quvib o‘tmoqchi bo‘lgan Nexia haydovchisi qarshisidan kelayotgan yuk mashinasiga urilishi oqibatida vafot etdi

Buxoro viloyati Kogon tumanida odam o‘limi bilan yakunlangan yo‘l-transport hodisasi sodir bo‘ldi, deya xabar bermoqda YHXBB.

Qayd etilishicha, 2021-yil 21-may kuni soat 22:30 larda Nexia haydovchisi Kogon tumani hududidan o‘tuvchi 4R-63 sonli avtomobil yo‘lining 10-kilometrida harakatlanib kelayotgan paytida o‘zidan oldinda harakatlanib borayotgan mashinani quvib o‘tish maqsadida qarama qarshi yo‘nalishga o‘tib harakatlanadi.

Oqibatda qarshisidan chiqqan HOWO rusumli yuk mashinasining old qismiga borib uriladi. Nexia haydovchisi kuchli jarohat olib, shifoxonaga yotqiziladi.

Biroq ko‘rsatilgan tibbiy yordamga qaramasdan, haydovchi vafot etdi.

YTH sodir bo‘lgan hududda tezlikni onlayn nazorat qiluvchi 3 ta ko‘chma radar o‘rnatildi. Yo‘l belgilari va chiziqlari to‘liq soz holatga keltirildi.

Bundan avval Namanganda Nexia pastlikka qulashi oqibatida bir kishi halok bo‘lgani, Surxondaryoda Damas va “KamAZ” to‘qnashuvida ikki kishi halok bo‘lgani hamda Farg‘onada boshqaruvni yo‘qotgan Nexia simyog‘ochga urilishi oqibatida 15 yoshli bola vafot etgani haqida xabar berilgandi.