Норвегия суди Tesla’ни қувватлантириш тезлигини ва дастурий таъминот янгиланганидан сўнг электрокарларнинг узоқ масофага юришини қасддан секинлаштирганликда айбдор деб топди. Автомобиль ишлаб чиқарувчи мазкур қарорга қарши далилларни келтирмаса, жабрланувчиларнинг ҳар бирига 136 минг кронадан (16 минг АҚШ доллар) компенсация тўлаши керак бўлади, деб ёзади Motor.
Мазкур муаммо ҳақида 2019 йилда маълум бўлган. Ўшанда 85 киловатт/соат батареялари ўрнатилган эски Tesla Модель S ва Модель Х эгалари дастурий таъминот янгилангандан сўнг, электрокарларнинг бир марта қувватланиш орқали босиб ўтадиган масофаси кескин камайиб кетганидан шикоят қилган. Electrek нашри 2014 йилги Модель S’ни мисол қилиб келтирган — машина янгиланишга қадар бир марта қувватланишда 397 километр йўл босган, янги дастурий таъминот ўрнатилгач эса бу 349 километрга (-11 фоиз) тушиб кетган. Янгиланишдан кейинги иккинчи муаммо — Supercharger станцияларида экспресс-қувватлантириш тезлигининг камайгани.
Компаниядагилар буни «аккумуляторни ҳимоя қилиш ва унинг хизмат кўрсатиш муддатини узайтириш» мақсадида дея тушунтирган ва бир марта қувватланиш орқали босиб ўтиладиган масофанинг камайтирилиши «у қадар кўп бўлмаган машиналарга» кузатилганини айтган. Бироқ ушбу баёнот электрокар эгаларини тинчлантирмаган ва улар компенсация сўраб, судга мурожаат қилган.
Даъволарнинг бири Норвегияда берилган. Компания дастурий таъминот янгиланганидан сўнг, тезликни ростдан ҳам камайтиргани боис маҳаллий суд Tesla’нинг зарарига қарор чиқарган.
Бугунги кунда Норвегияда 10 мингга яқин одам Tesla электрокарларидан фойдаланади. Компенсациядан ташқари автомобиль ишлаб чиқарувчи катта миқдорда жаримага ҳам тортилиши мумкин. Шу билан бирга, АҚШнинг ўзида ҳам Tesla устида суд жараёнлари давом этмоқда.
Аввалроқ Tesla Хитойдан 50 мингга яқин автомобилини чақириб олишга мажбур бўлаётгани тўғрисида хабар берилганди.
Изоҳ (0)