Cars сайти дунёдаги энг арзон автомобиль ҳисобланувчи Bajaj Qute микромашинаси ҳамда велосипед ўртасида пойга уюштирди. Qute’га 13 от кучига эга мотор ўрнатилган бўлса, велосипедни профессионал пойгачи бошқарган, деб хабар беради Motor.
Квадротцикл 13 от кучи ва 19 Нм айланувчи моментга эга 216 сантиметр кубли бир цилиндрга эга мотор билан жиҳозланган. Бу каби агрегат билан у соатига 70 километр тезликда ҳаракатлана олади.
Биринчи пойга Qute учун муваффақиятсиз якунланган: салонда ҳайдовчидан ташқари яна уч киши бўлгани сабаб квадротцикл велосипедни қувиб ўтиш учун етарлича тезликка эриша олмаган. Иккинчи уриниш йўловчиларсиз амалга оширилган — Qute ичида фақат ҳайдовчи бўлган. Мазкур ҳолатда ҳам автомобилнинг ғалабаси кафолатланмаган ва финиш чизиғини ким биринчи бўлиб кесиб ўтиши сўнгги сонияларгача номаълум бўлган.
Bajaj Qute 2016—2020 йилларда Россияда ҳам сотилган бўлиб, ўша вақтда унинг нархи 337 минг рублни (4,5 минг доллар) ташкил этган.
Аввалроқ 44 тоннали Mercedes ва Scania юк машиналари пойга майдончасида куч синашгани, YouTube’даги Sport Auto канали экспертлари орқа узатмали, ўрта моторли спорткарлар Chevrolet Corvette C8 Stingray, Porsche 911 Carrera S (992) ва янгиланган Audi R8 RWD’ни ўзаро таққослаб кўргани тўғрисида хабар берилганди.
Изоҳ (0)