Namanganda Nexia pastlikka qulashi oqibatida bir kishi halok bo‘ldi

Namangan viloyatining Pop tumanida Nexia pastlikka qulashi oqibatida bir kishi halok bo‘ldi, yana ikki kishi jarohat oldi. Bu haqda YHXBB matbuot xizmati xabar berdi.

Voqea 24-may kuni soat 18:00 larda Toshkent—O‘sh avtomobil yo‘lining 279-kilometrida yuz bergan. Haydovchi Nexia’da harakatlanayotib, boshqaruvni yo‘qotgan va beton to‘siqqa urilgan. Natijada yo‘ldan chiqib ketib, pastlikka tushib ketgan.

Oqibatda haydovchi hamda 20 va 35 yoshli yo‘lovchilar tan jarohatlari olib, tuman shifoxonasiga yotqizilgan. Yana bir yo‘lovchi olgan tan jarohatlari sababli vafot etgan.

Holat yuzasidan Pop tumani IIB huzuridagi TB tomonidan Jinoyat kodeksining 266-moddasi 2-qismi bilan jinoyat ishi qo‘zg‘atilib, dastlabki tergov harakatlari olib borilmoqda.

Avvalroq Surxondaryoda Damas va “KamAZ” to‘qnashuvida ikki kishi halok bo‘lgani, 8 yoshli qiz va yana bir kishi og‘ir tan jarohatlari olgani ma’lum qilingandi. Undan avval Angrenda 8 ta transport vositasi — yuk mashinasi, 3 ta Lacetti, 2 ta Nexia-3, Cobalt va Matiz ishtirok etgan yirik YTH sodir bo‘lgani haqida xabar berilgan edi. Hodisa oqibatida jami 7 nafar shaxs vafot etgan, 14 nafar shaxs olgan tan jarohatlari bilan shifoxonaga yotqizilgan. Holat yuzasidan jinoyat ishi qo‘zg‘atilgan.